អាជ្ញាធរបានឲ្យដឹងថា ការវាយប្រហាររបស់អ៊ីស្រាអែល នៅភាគខាងត្បូងនៃប្រទេសលីបង់ បានបណ្ដាលឲ្យមនុស្ស ២នាក់យ៉ាងតិចបាត់ជីវិត នៅថ្ងៃពុធ (ទី២១ ខែមករា ឆ្នាំ២០២៦) នេះ ខណៈដែលអ៊ីស្រាអែលអះអាងថា ខ្លួនបានកំណត់គោលដៅលើក្រុមសកម្មប្រយុទ្ធមកពីក្រុមហេសបូឡា។

អ៊ីស្រាអែលបានបន្តការវាយប្រហារជាប្រចាំទៅលើលីបង់ ទោះបីជាមានបទឈប់បាញ់ កាលពីខែវិច្ឆិកា ឆ្នាំ២០២៤ ដែលស្វែងរកការបញ្ចប់អរិភាពជាង ១ឆ្នាំ ជាមួយក្រុមហេសបូឡាក៏ដោយ ដោយជាធម្មតាបានផ្ដល់ហេតុផលថា ពួកគេកំពុងកំណត់គោលដៅលើសមាជិកនៃក្រុមគាំទ្រដោយអ៊ីរ៉ង់ ឬហេដ្ឋារចនាសម្ព័ន្ធរបស់ក្រុមនេះ។

ដោយសំដៅទៅលើតំបន់មួយដែលនៅឆ្ងាយពីព្រំដែនអ៊ីស្រាអែល ក្រសួងសុខាភិបាលបានប្រាប់ថា៖ «ការវាយប្រហាររបស់សត្រូវ (អ៊ីស្រាអែល) លើយានយន្តមួយគ្រឿង នៅទីក្រុង Zahrani ក្នុងតំបន់ Sidon បានសម្លាប់មនុស្សម្នាក់»។

អ្នកឆ្លើយឆ្លងព័ត៌មានរបស់សាព័ត៌មាន AFP ម្នាក់ បានឃើញរថយន្តឆេះម៉ត់ខ្ទេច នៅលើផ្លូវធំមួយ ដែលមានកម្ទេចកម្ទីរាយប៉ាយពាសពេញតំបន់នោះ ហើយបុគ្គលិកសង្គ្រោះបន្ទាន់ កំពុងបំពេញការងាររបស់ខ្លួន។

បន្ទាប់មក ក្រសួងបានបន្ថែមថា ការវាយប្រហារមួយផ្សេងទៀតដែលកំណត់គោលដៅលើយានយន្តមួយគ្រឿង នៅទីក្រុង Bazuriyeh ក្នុងតំបន់ Tyre បានបណ្ដាលឲ្យមនុស្សមា្នក់ស្លាប់៕