ប្រទេសចិន នៅថ្ងៃពុធ (ទី២១ ខែមករា ឆ្នាំ២០២៦) នេះ បានប្រាប់ឲ្យដឹងថា ខ្លួននឹងការពារប្រព័ន្ធអន្តរជាតិ ដោយមានអង្គការសហប្រជាជាតិ (UN) «ជាស្នូល» ដោយការលើកឡើងនេះ បានកើតឡើងមួយថ្ងៃបន្ទាប់ពីមានការប្រកាស ដែលថា ខ្លួនត្រូវបានអញ្ជើញឲ្យចូលរួមជាមួយ «ក្រុមប្រឹក្សាសន្តិភាព» របស់ប្រធានាធិបតីអាមេរិក លោក Donald Trump។

ទីក្រុងប៉េកាំងបានបញ្ជាក់ថា ខ្លួនបានទទួលការអញ្ជើញឲ្យចូលរួមក្រុមប្រឹក្សានេះ ដែលមានគោលបំណងដោះស្រាយជម្លោះនានា។ យ៉ាងណាក្ដី ប្រទេសចិនមិនទាន់បានបញ្ជាក់នៅឡើយទេថា តើខ្លួននឹងទទួលយកការអញ្ជើញនេះដែរ ឬអត់ ប៉ុន្តែអំឡុងសន្និសីទសារព័ត៌មាន នាថ្ងៃទី២១ ខែមករានេះ អ្នកនាំពាក្យក្រសួងការបរទេស លោក Guo Jiakun បានលើកឡើងថា ទីក្រុងប៉េកាំងនឹងគាំទ្រសណ្តាប់ធ្នាប់ពិភពលោកអន្តរជាតិដែលមានមូលដ្ឋាននៅ UN ដោយមិនគិតដល់ «ការផ្លាស់ប្តូរ» ឡើយ។

លោក Guo បានសង្កត់ធ្ងន់ថា៖ «មិនថាស្ថានភាពអន្តរជាតិផ្លាស់ប្តូរយ៉ាងណានោះទេ ប្រទេសចិនបន្តគាំទ្រយ៉ាងម៉ឺងម៉ាត់ដល់ប្រព័ន្ធអន្តរជាតិដែលមាន UN ជាស្នូល ទំនាក់ទំនងអន្តរជាតិដោយផ្អែកលើវត្ថុបំណង និងគោលការណ៍នៃធម្មនុញ្ញរបស់ UN»។

គួរបញ្ជាក់ថា ចិនដែលជាប្រទេសមានសេដ្ឋកិច្ចធំជាងគេទី២ របស់ពិភពលោក និងជាសមាជិកអចិន្ត្រៃយ៍នៃក្រុមប្រឹក្សាសន្តិសុខ UN ការពារប្រព័ន្ធ UN ជាប្រពៃណី ខណៈដែលអំពាវនាវឲ្យមានកំណែទម្រង់៕