ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ (២១ មករា) ថា លោកនឹងជួបជាមួយលោកប្រធានាធិបតីអ៊ុយក្រែន Volodymyr Zelenskyy នៅប្រទេសស្វីស ដោយបន្ថែមថា លោកមានអារម្មណ៍ថា ឥឡូវនេះ លោក Zelenskyy និងប្រធានាធិបតីរុស្ស៊ី លោក Vladimir Putin ស្ថិតនៅចំណុចមួយដែលអាចឈានដល់កិច្ចព្រមព្រៀងមួយដើម្បីបញ្ចប់សង្គ្រាមជិត ៤ឆ្នាំនៅអ៊ុយក្រែនហើយ។

លោក Trump បន្តថា លោកកំពុងដោះស្រាយជាមួយលោក Putin ហើយថា មេដឹកនាំរុស្ស៊ីរូបនេះ «ចង់ធ្វើកិច្ចព្រមព្រៀងបញ្ចប់សង្គ្រាម» ចំណែកមេដឹកនាំអ៊ុយក្រែន ក៏បានត្រៀមខ្លួនរួចជាស្រេចដើម្បីឈានដល់កិច្ចព្រមព្រៀងមួយផងដែរ។ ថ្លែងក្នុងកិច្ចពិភាក្សាមួយបន្ទាប់ពីសុន្ទរកថាទៅកាន់មេដឹកនាំពិភពលោក និងនាយកប្រតិបត្តិអាជីវកម្មនៅទីក្រុងដាវ៉ូស ប្រទេសស្វីស លោក Trump បានលើកឡើងថា «កាលពីមុន មេដឹកនាំទាំងពីរ (សំដៅលើរុស្ស៊ី និងអ៊ុយក្រែន) បានដកថយពីកិច្ចព្រមព្រៀង ប៉ុន្តែឥឡូវនេះ កិច្ចព្រមព្រៀងខិតកាន់តែជិតហើយ»។

ដំបូងឡើយ លោក Trump និយាយថា លោកនឹងជួបលោក Zelenskyy នៅល្ងាចថ្ងៃពុធ ប៉ុន្តែក្រោយមក បានបញ្ជាក់ឡើងវិញថា កិច្ចប្រជុំនេះត្រូវគ្រោងទុកសម្រាប់ថ្ងៃព្រហស្បតិ៍ ទី២២ ខែមករា នេះ។ សុន្ទរកថាដែលហាក់ដូចជាមានភាពល្អប្រសើរឡើងវិញនេះ បានកើតឡើងបន្ទាប់ពីការរិះគន់របស់លោក Trump កាលពីសប្តាហ៍មុន ដែលថា ឧបសគ្គចម្បងក្នុងការឈានដល់កិច្ចព្រមព្រៀងនៅអ៊ុយក្រែន គឺជាលោក Zelenskyy។

កាលពីថ្ងៃអង្គារ ប្រធានាធិបតីអ៊ុយក្រែនរូបនេះបាននិយាយថា លោកមិនមានគម្រោងទៅកាន់ប្រទេសស្វីសនោះទេ បន្ទាប់ពីរុស្ស៊ី បើកការវាយប្រហារទ្រង់ទ្រាយធំថ្មីមួយលើទីក្រុងគីវ ប៉ុន្តែលោកបានបញ្ចាក់ថា លោកនឹងនៅតែទៅទីក្រុងដាវ៉ូស ប្រសិនបើឯកសារស្តីពីការធានាសន្តិសុខជាមួយអាមេរិក និងផែនការវិបុលភាពអ៊ុយក្រែន ត្រូវបានត្រៀមរួចរាល់ដើម្បីចុះហត្ថលេខានៅទីនោះ៕