តុលាការឧទ្ធរណ៍សហរដ្ឋអាមេរិក កាលពីថ្ងៃពុធ (២១ មករា) បានសម្រេចផ្អាកដីកាមួយរបស់តុលាការជាន់ទាប ដែលដីកានោះមានបំណងរារាំងភ្នាក់ងារអន្តោប្រវេសន៍សហព័ន្ធ មិនឱ្យប្រើយុទ្ធសាស្រ្តដៃធ្ងន់ ដូចជាឧស្ម័នបង្ហូរទឹកភ្នែក ឬប្រើប្រាស់កម្លាំងបាយប្រឆាំងនឹងក្រុមបាតុករ ដែលតវ៉ាដោយសន្តិវិធីនៅរដ្ឋ Minnesota ជាទីដែលភាពតានតឹងកើនឡើងខ្លាំង ក្នុងអំឡុងពេលនៃការប្រឈមមុខដាក់គ្នារវាងរដ្ឋាភិបាលសហព័ន្ធ និងរដ្ឋាភិបាលមូលដ្ឋាន។

ក្រុមបាតុករមួយចំនួន ដែលតវ៉ាប្រឆាំងនឹងការអនុវត្តច្បាប់អន្តោប្រវេសន៍ដ៏តឹងរ៉ឹងរបស់ប្រធានាធិបតីសហរដ្ឋអាមេរិក Donald Trump នៅក្នុងតំបន់ Minneapolis បានដាក់បណ្ដឹងប្រឆាំងនឹងរដ្ឋបាលរបស់លោក កាលពីខែធ្នូ ដោយនិយាយថា សិទ្ធិរដ្ឋធម្មនុញ្ញរបស់ពួកគេ កំពុងត្រូវបានរំលោភបំពាន។

ភ្នាក់ងារល្បាតព្រំដែន ព្រមទាំង ភ្នាក់ងារអនុវត្តច្បាប់អន្តោប្រវេសន៍ និងគយ (ICE) រាប់ពាន់នាក់ ដែលត្រូវបានទៅកាន់តំបន់ Minneapolis ក្នុងប៉ុន្មានសប្តាហ៍ថ្មីៗនេះ មានការប៉ះទង្គិចដោយហិង្សាជាច្រើនលើកច្រើនសារជាមួយអ្នកស្រុក។

កាលពីថ្ងៃសុក្រសប្តាហ៍មុន ចៅក្រមប្រចាំតំបន់សហរដ្ឋអាមេរិក នៅរដ្ឋ Minnesota បានចេញដីកាបង្គាប់ឱ្យភ្នាក់ងារ ICE ដែលដាក់ពង្រាយនៅទីក្រុង Minneapolis ត្រូវបានហាមឃាត់ជាបណ្តោះអាសន្នមិនឱ្យប្រើប្រាស់ឧស្ម័នបង្ហូរទឹកភ្នែក និងយុទ្ធសាស្ត្រផ្សេងទៀតប្រឆាំងនឹងក្រុមបាតុករអហិង្សាឡើយ ខណៈដែលបណ្តឹងកំពុងដំណើរការ។

ក្រោយមក ក្រសួងសន្តិសុខមាតុភូមិអាមេរិក បានប្ដឹងឧទ្ធរណ៍ ដោយអះអាងថា ដីកានេះធ្វើឱ្យប៉ះពាល់ដល់អំណាចរបស់រដ្ឋបាលលោក Trump «ក្នុងការអនុវត្តច្បាប់អន្តោប្រវេសន៍របស់ប្រទេស»។ នៅថ្ងៃពុធសប្ដាហ៍នេះ តុលាការឧទ្ធរណ៍ដែលមានមូលដ្ឋាននៅតំបន់ St. Louis បានសម្រេចឈរខាងរដ្ឋបាលសហព័ន្ធ ដោយផ្អាកដីកាចៅក្រមប្រចាំតំបន់នៅរដ្ឋ Minnesota នេះជាបណ្ដោះអាសន្នសិន៕