ក្រុមអ្នកជួយសង្គ្រោះនៅប្រទេសនូវែលសេឡង់ កំពុងប្រឹងប្រែងស្វែងរកមនុស្សជាច្រើននាក់ដែលបានបាត់ខ្លួន រួមទាំងកុមារផងដែរ នៅថ្ងៃព្រហស្បតិ៍ (២២ មករា) នេះ បន្ទាប់ពីភ្លៀងធ្លាក់ខ្លាំងក្លាបានបង្កជាគ្រោះបំណាក់ដីដ៏ធំនៅឯទីលានបោះជំរំមួយកន្លែង បណ្ដាលឱ្យខូចខាតយ៉ាងទូលំទូលាយ និងបានធ្វើឱ្យមនុស្សរាប់ពាន់នាក់គ្មានថាមពលអគ្គិសនីប្រើប្រាស់។

អ្នកស្រុកត្រូវបានជម្លៀសចេញ និងផ្លូវថ្នល់ត្រូវបានបិទ ខណៈភ្លៀងធ្លាក់ខ្លាំងបានវាយប្រហារស្ទើរតែទូទាំងឆ្នេរសមុទ្រភាគខាងកើតនៃកោះ North Island របស់នូវែលសេឡង់។ អាជ្ញាធរនិយាយថា បំណាក់ដីនេះបានកើតឡើងនៅពេលព្រឹកម៉ោងក្នុងស្រុក ដោយបានបញ្ជូនកម្ទេចកម្ទីគ្របសង្កត់លើទីតាំងបោះជំរំនៅភ្នំ Maunganui ដែលជាទីទេសចរណ៍ដ៏ពេញនិយម នៅលើឆ្នេរសមុទ្រភាគខាងជើងនៃប្រទេស។

ក្នុងសន្និសីទសារព័ត៌មានមួយ អាជ្ញាធរបាននិយាយថា គ្រួសាររាប់រយនាក់នៅកន្លែងកើតហេតុ ត្រូវបានជម្លៀសចេញ ហើយសេវាសង្គ្រោះបន្ទាន់កំពុងធ្វើការដើម្បីស្វែងរកអ្នកនៅសេសសល់ក្នុងតំបន់នោះ។ លោក Tim Anderson អធិការនគរបាលស្រុកក្នុងតំបន់ បាននិយាយថា ចំនួនមនុស្សដែលបាត់ខ្លួនគឺស្ថិតក្នុង «តួលេខតែ ១ខ្ទង់ប៉ុណ្ណោះ» ដោយមិនបញ្ចាក់ច្បាស់ៗថាបាត់ខ្លួនប៉ុន្មានអ្នកនោះទេ។

ប្រព័ន្ធផ្សព្វផ្សាយក្នុងស្រុកបានស្រង់សម្តីរដ្ឋមន្ត្រីក្រសួងគ្រប់គ្រងគ្រោះមហន្តរាយ និងស្តារឡើងវិញរបស់នូវែលសេឡង់ ដែលបាននិយាយថា កុមារក៏ស្ថិតក្នុងចំណោមអ្នកបាត់ខ្លួននោះដែរ ហើយឧទ្ធម្ភាគចក្រត្រូវបានដាក់ពង្រាយដើម្បីជួយដល់កិច្ចខិតខំប្រឹងប្រែងស្វែងរក និងជួយសង្គ្រោះ៕