យោងតាមរបាយការណ៍ជាច្រើន សហរដ្ឋអាមេរិកកំពុងបង្កើនការដាក់ពង្រាយយោធារបស់ខ្លួននៅមជ្ឈិមបូព៌ា ស្របពេលមានភាពតានតឹងកើនឡើងជាមួយអ៊ីរ៉ង់។

របាយការណ៍ជាច្រើនបាននិយាយថា យន្តហោះចម្បាំង F-15E Strike Eagle ជាង១០គ្រឿងបានចាកចេញពីចក្រភពអង់គ្លេសនៅថ្ងៃទី១៨ ខែមករា ក្នុងដំណើរទៅកាន់មជ្ឈិមបូព៌ា អមដោយយន្តហោះដឹកជញ្ជូន C-17 Globemaster III។ បញ្ជាការកណ្តាលសហរដ្ឋអាមេរិកបានបញ្ជាក់នៅថ្ងៃទី២០ ខែមករាសប្ដាហ៍នេះថា យន្តហោះ F-15E ត្រូវបានដាក់ពង្រាយទៅកាន់តំបន់នេះរួចហើយ។

ទិន្នន័យតាមដានការហោះហើរប្រភពបើកចំហ និងការបង្ហាញព័ត៌មានយោធាអាមេរិកថ្មីៗ បង្ហាញថា យន្តហោះ F-15E ចំនួនបីគ្រឿងឥឡូវនេះកំពុងឈរជើងនៅមជ្ឈិមបូព៌ា។ យន្តហោះចម្បាំង F-16 បន្ថែម និងយន្តហោះវាយប្រហារ A-10 Thunderbolt II ក៏ត្រូវបានគេរំពឹងថានឹងត្រូវបានដាក់ពង្រាយផងដែរ។

ទន្ទឹមនឹងនេះ ក្រុមនាវាផ្ទុកយន្តហោះវាយប្រហារ USS Abraham Lincoln កំពុងបន្តសកម្មភាពរបស់ខ្លួនឆ្ពោះទៅកាន់តំបន់នេះ។ ដោយដកស្រង់ទិន្នន័យតាមដានសមុទ្រនៅថ្ងៃទី ២០មករា មន្ត្រីសហរដ្ឋអាមេរិកនិយាយថា ក្រុមនាវាផ្ទុកយន្តហោះបានឆ្លងកាត់ច្រកសមុទ្រម៉ាឡាកា ដោយបិទឧបករណ៍បញ្ជូនសញ្ញារបស់ខ្លួន។  

អ៊ីរ៉ង់បានឆ្លើយតបកាលពីថ្ងៃពុធ ២១មករា សប្ដាហ៍នេះជាមួយនឹងការព្រមានសងសឹក។រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ការវាយប្រហារថ្មីណាមួយប្រឆាំងនឹងអ៊ីរ៉ង់នឹងត្រូវបានឆ្លើយតបយ៉ាងម៉ឺងម៉ាត់ ខណៈសង្កត់ធ្ងន់ថា ទីក្រុងតេអេរ៉ង់ នៅតែបើកចំហចំពោះការសម្រេចបានកិច្ចព្រមព្រៀងដោយយុត្តិធម៌។ លោកបានអំពាវនាវឱ្យទីក្រុងវ៉ាស៊ីនតោនចូលរួមជាមួយអ៊ីរ៉ង់ដោយផ្អែកលើការគោរពគ្នាទៅវិញទៅមក៕