យោធាសហរដ្ឋអាមេរិក បាននិយាយកាលពីថ្ងៃពុធ ទី ២១ ខែមករា ថា ខ្លួនបានចាប់ផ្តើមផ្ទេរអ្នកជាប់ឃុំពីក្រុមរដ្ឋអ៊ីស្លាម ដែលកំពុងត្រូវបានឃុំខ្លួននៅភាគឦសានប្រទេសស៊ីរីទៅកាន់អគារសុវត្ថិភាពនៅក្នុងប្រទេសអ៊ីរ៉ាក់។

ចំណាត់ការនេះបានធ្វើឡើងបន្ទាប់ពីកងកម្លាំងរដ្ឋាភិបាលស៊ីរី បានគ្រប់គ្រងជំរំដ៏ធំទូលាយមួយកន្លែង ដែលផ្តល់ទីជម្រកដល់មនុស្សរាប់ពាន់នាក់ភាគច្រើនជាស្ត្រី និងកុមារ មកពីកងកម្លាំងប្រជាធិបតេយ្យស៊ីរី ឬ SDF គាំទ្រដោយសហរដ្ឋអាមេរិក ដែលបានដកខ្លួនថយជាផ្នែកមួយនៃបទឈប់បាញ់។ កងទ័ព កាលពីថ្ងៃចន្ទបានដណ្តើមយកពន្ធនាគារមួយក្នុងទីក្រុង Shaddadeh ភាគឦសាន ជាកន្លែងដែលអ្នកជាប់ឃុំរដ្ឋអ៊ីស្លាមមួយចំនួនបានរត់គេចខ្លួន ហើយជាច្រើននាក់ត្រូវបានចាប់ខ្លួនមកវិញ នេះបើយោងតាមប្រព័ន្ធផ្សព្វផ្សាយរដ្ឋ។

កងកម្លាំងប្រជាធិបតេយ្យស៊ីរី(SDF) ដឹកនាំដោយក្រុមឃឺដ នៅតែគ្រប់គ្រងមន្ទីរឃុំឃាំងជាងដប់កន្លែងដែលឃុំខ្លួនសមាជិករដ្ឋអ៊ីស្លាមប្រហែល៩.០០០នាក់ ប៉ុន្តែគ្រោងនឹងប្រគល់ពន្ធនាគារទាំងនោះទៅឱ្យការគ្រប់គ្រងរបស់រដ្ឋាភិបាលក្រោមដំណើរការសន្តិភាព ដែលត្រូវបានគេសន្មត់ថានឹងដាក់បញ្ចូលកងកម្លាំងប្រជាធិបតេយ្យស៊ីរី(SDF) ជាមួយកងកម្លាំងរដ្ឋាភិបាល នៅទីបំផុត។

ទីបញ្ជាការកណ្តាលសហរដ្ឋអាមេរិក បាននិយាយថា ការផ្ទេរលើកដំបូងពាក់ព័ន្ធនឹងសមាជិកក្រុមរដ្ឋអ៊ីស្លាមចំនួន១៥០នាក់ ដែលត្រូវបាននាំមកពីខេត្ត Hassakeh ភាគឦសានរបស់ប្រទេសស៊ីរីទៅកាន់ «ទីតាំងសុវត្ថិភាព» នៅក្នុងប្រទេសអ៊ីរ៉ាក់។ សេចក្តីថ្លែងការណ៍នេះបាននិយាយថា អ្នកជាប់ឃុំរហូតដល់ ៧.០០០ នាក់អាចត្រូវបានផ្ទេរទៅកាន់មន្ទីរឃុំឃាំងដែលគ្រប់គ្រងដោយប្រទេសអ៊ីរ៉ាក់។