ប្រធានាធិបតីអេក្វាឌ័រ លោក Daniel Noboa បានបង្ហាញថា នៅខែក្រោយ ប្រទេសរបស់លោកនឹងចាប់ផ្តើមដាក់ «ការដំឡើងពន្ធសន្តិសុខ» ៣០ភាគរយលើប្រទេសកូឡុំប៊ីដែលនៅជិតខាងខ្លួន ចំពោះការមិនបានទប់ស្កាត់ការជីកយករ៉ែខុសច្បាប់ និងការជួញដូរកូកាអ៊ីន។

ការប្រកាសកាលពីថ្ងៃពុធ បង្ហាញពីវិធានការស្រដៀងគ្នានេះ ធ្វើឡើងដោយប្រធានាធិបតីសហរដ្ឋអាមេរិក លោក Donald Trump ដែលបានរិះគន់រដ្ឋាភិបាលឆ្វេងនិយមរបស់ប្រទេសកូឡុំប៊ី ចំពោះការមិនបន្តវិធីសាស្រ្តឲ្យបានកាន់តែខ្លាំងក្លាចំពោះការជួញដូរគ្រឿងញៀន។

នៅក្នុងការបង្ហោះនៅលើបណ្តាញផ្សព្វផ្សាយសង្គម លោក Noboa បានបង្ហាញការដំឡើងពន្ធថ្មីលើការនាំចូលរបស់ប្រទេសកូឡុំប៊ី។ លោកបានព្រមានថា ពន្ធថ្មីនឹងនៅតែមានសុពលភាពរហូតដល់ប្រទេសនេះបង្ហាញពី «ការប្តេជ្ញាចិត្តពិតប្រាកដក្នុងការរួមគ្នាប្រឈមនឹងការជួញដូរគ្រឿងញៀន និងការជីកយករ៉ែខុសច្បាប់នៅតាមព្រំដែន»។ លោក Noboa បានសរសេរថា «យើងបានខិតខំប្រឹងប្រែងយ៉ាងពិតប្រាកដដើម្បីសហការជាមួយប្រទេសកូឡុំប៊ី ទោះបីជាប្រឈមនឹងឱនភាពពាណិជ្ជកម្មលើសពី១ពាន់លានដុល្លារជារៀងរាល់ឆ្នាំក៏ដោយ»។

«ប៉ុន្តែខណៈយើងបានទទូចឱ្យមានការសន្ទនា យោធារបស់យើងនៅតែបន្តប្រឈមមុខនឹងក្រុមឧក្រិដ្ឋជនដែលជាប់ពាក់ព័ន្ធនឹងការជួញដូរគ្រឿងញៀននៅតាមព្រំដែនដោយគ្មានកិច្ចសហប្រតិបត្តិការពីប្រទេសកូឡុំប៊ី។ ដូច្នេះ ដោយសារកង្វះសកម្មភាពខ្លាំងក្លានិងចំណាត់ការទៅវិញទៅមក ប្រទេសអេក្វាឌ័រនឹងអនុវត្តការដំឡើងពន្ធសន្តិសុខ៣០ភាគរយលើការនាំចូលពីប្រទេសកូឡុំប៊ី ចាប់ពីថ្ងៃទី១ ខែកុម្ភៈ»។