លោក Albert Ramdin អគ្គលេខាធិការនៃអង្គការរដ្ឋអាមេរិក(OAS) បានស្វាគមន៍ការដោះលែងអ្នកទោសនយោបាយនៅក្នុងប្រទេសវ៉េណេស៊ុយអេឡា ប៉ុន្តែបានបញ្ជាក់កាលពីថ្ងៃពុធ ទី២១ ខែមករា ថា មនុស្សរាប់រយនាក់ទៀតនៅតែជាប់ឃុំឃាំង និងបានជំរុញឱ្យអាជ្ញាធរពន្លឿនការដោះលែងពួកគេទាំងហេតុផលមនុស្សធម៌ និងនយោបាយ។

សាច់ញាតិរបស់អ្នកទោសវ៉េណេស៊ុយអេឡា បានមកប្រមូលផ្តុំគ្នានៅខាងក្រៅមជ្ឈមណ្ឌលឃុំឃាំងនគរបាលតំបន់៧ ក្នុងទីក្រុងការ៉ាកាស ដោយជជែកការពារជាមួយមន្ត្រីកងកម្លាំងប្រដាប់អាវុធ និងនគរបាលបង្ក្រាបកុបកម្ម ខណៈពួកគេកំពុងរង់ចាំដំណឹងអំពីមនុស្សជាទីស្រលាញ់របស់ខ្លួន។

ក្រុមសិទ្ធិមនុស្សវ៉េណេស៊ុយអេឡា Foro Penal បានបញ្ជាក់ពីការដោះលែងអ្នកទោសនយោបាយចំនួន ១៣៩នាក់ចាប់តាំងពីថ្ងៃទី៨ ខែមករា។ មន្ត្រីអង្គការរដ្ឋអាមេរិក(OAS) បានសង្កត់ធ្ងន់ថា គណៈកម្មការអន្តរអាមេរិកទទួលបន្ទុកសិទ្ធិមនុស្ស នៅតែព្រួយបារម្ភជាបន្តបន្ទាប់លើប្រទេសវ៉េណេស៊ុយអេឡា និងបានអំពាវនាវឱ្យអាជ្ញាធរអនុញ្ញាតឱ្យមានដំណើរទស្សនកិច្ចក្នុងស្រុក។

រដ្ឋាភិបាលថ្មីរបស់ប្រទេសវ៉េណេស៊ុយអេឡា បានសន្យាថានឹងដោះលែងអ្នកទោសនយោបាយមួយចំនួនធំបន្ទាប់ពីការបណ្តេញចេញពីតំណែងនិងចាប់ខ្លួនអតីតប្រធានាធិបតី លោក Nicolas Maduro ដោយកងកម្លាំងសហរដ្ឋអាមេរិកកាលពីថ្ងៃទី៣ ខែមករា ទោះបីជាមនុស្សជិត៨០០នាក់នៅតែជាប់ឃុំឃាំងក៏ដោយ នេះបើយោងតាមក្រុមសិទ្ធិមនុស្ស។