ក្រសួងសន្តិសុខមាតុភូមិសហរដ្ឋអាមេរិក បាននិយាយកាលពីថ្ងៃពុធ (២១ មករា) ថា រដ្ឋបាលរបស់លោកប្រធានាធិបតី Donald Trump បានចាប់ផ្តើមប្រតិបត្តិការអនុវត្តច្បាប់អន្តោប្រវេសន៍នៅក្នុងរដ្ឋ Maine ដោយកំណត់គោលដៅលើរដ្ឋមួយ ដែលជាជម្រករបស់សហគមន៍ជនភៀសខ្លួនយ៉ាងច្រើន រួមទាំងជនជាតិសូម៉ាលីផងដែរ។

ក្រសួងបាននិយាយក្នុងសេចក្តីប្រកាសព័ត៌មានមួយថា ខ្លួនបានចាប់ផ្តើម «ប្រតិបត្តិការតាមចាប់ប្រចាំថ្ងៃ» កាលពីថ្ងៃអង្គារ ដោយកំណត់គោលដៅទៅលើអ្នកដែលខ្លួនហៅថាជា ជនល្មើសព្រហ្មទណ្ឌ។ ប្រភពពីមន្ត្រីអន្តោប្រវេសន៍បច្ចុប្បន្ន និងអតីតមន្ត្រី បាននិយាយថា ភ្នាក់ងារជាង ១០០នាក់ បានទៅល់រដ្ឋភាគឦសានដ៏ត្រជាក់នេះហើយ ក្នុងសប្តាហ៍នេះ ហើយប្រតិបត្តិការនឹងផ្តោតលើជនភៀសខ្លួន។

កាលពីសប្តាហ៍មុន អភិបាលរដ្ឋ Maine លោកស្រី Janet Mills ដែលជាសមាជិកបក្សប្រជាធិបតេយ្យ បាននិយាយថា យុទ្ធសាស្ត្រអនុវត្តច្បាប់ដ៏កម្រោលរបស់រដ្ឋបាលលោក Trump គឺ «មិនត្រូវបានស្វាគមន៍នោះទេ»។ លោក Trump ដែលជាប្រធានាធិបតីមកពីបក្សសាធារណរដ្ឋ បានបង្កើនវត្តមានភ្នាក់ងារអន្តោប្រវេសន៍ទៅកាន់ទីក្រុងនិងរដ្ឋនានាដែលដឹកនាំដោយបក្សប្រជាធិបតេយ្យ ចាប់តាំងពីពាក់កណ្តាលឆ្នាំ២០២៥មក។

លោក Trump បានហៅប្រតិបត្តិការអនុវត្តច្បាប់ដ៏តឹងរ៉ឹងនេះថា មានភាពចាំបាច់ណាស់ ដើម្បីប្រយុទ្ធប្រឆាំងនឹងឧក្រិដ្ឋកម្ម។ លោក Trump បានរិះគន់ជនអន្តោប្រវេសន៍សូម៉ាលីជាពិសេស បន្ទាប់ពីជនជាតិអាមេរិកាំងសូម៉ាលីមួយចំនួន ត្រូវបានចោទប្រកាន់ពីបទក្លែងបន្លំនៅរដ្ឋ Minnesota ដោយលោកបានហៅអ្នកទាំងនោះថា "សំរាម" ហើយនិយាយថា ពួកគេគួរតែចាកចេញពីសហរដ្ឋអាមេរិក៕