ក្រុមមន្ត្រីបាននិយាយនៅថ្ងៃពុធ (២១ មករា) ថា ចំនួនអ្នកស្លាប់ដោយសារអគ្គិភ័យដ៏ធំ ដែលឆាបឆេះផ្សារទំនើបមួយកន្លែងនៅក្នុងទីក្រុងកំពង់ផែ Karachi ភាគខាងត្បូងប្រទេសប៉ាគីស្ថាន បានកើនឡើងដល់ ៦០នាក់ហើយ បន្ទាប់ពីសាកសពយ៉ាងហោចណាស់ ៣០នាក់ ត្រូវបានរកឃើញពីក្នុងហាងមួយនៃអគារពហុជាន់មួយនោះ។

មន្ត្រីនគរបាលជាន់ខ្ពស់ក្នុងតំបន់ បានប្រាប់សារព័ត៌មានចិនស៊ីនហួថា សាកសពទាំងនោះត្រូវបានរកឃើញពីជាន់ឡៅតឿនៃផ្សារទំនើប ដោយបន្ថែមថា មនុស្សជាច្រើននាក់នៅតែបាត់ខ្លួន ហើយប្រតិបត្តិការស្វែងរក នៅតែបន្តដើម្បីតាមរកអ្នកទាំងនោះ។

មន្ត្រីរូបនេះបាននិយាយថា ក្រុមជួយសង្គ្រោះកំពុងប្រឈមការលំបាកក្នុងការទៅដល់ផ្នែកខ្លះនៃអគារ ដោយសារតែផ្សែង និងកម្ដៅនៅខាងក្នុងរចនាសម្ព័ន្ធដែលខូចខាត ហើយផ្នែកមួយនៃអគារត្រូវបានសម្អាត ខណៈផ្នែកពីរផ្សេងទៀត កំពុងត្រូវបានរុះរើដើម្បីជួយសង្គ្រោះមនុស្សដែលនៅជាប់ក្រោមគំនរបាក់បែក។

អគ្គិភ័យបានផ្ទុះឡើងនៅយប់ថ្ងៃសៅរ៍កន្លងទៅ នៅមជ្ឈមណ្ឌលផ្សារទំនើប Gul Plaza ដ៏ធំទូលាយ និងពហុជាន់ ក្នុងតំបន់ពាណិជ្ជកម្មរបស់ទីក្រុង។ លោក Syed Hassan Naqvi ស្នងការក្រុង Karachi បាននិយាយថា ការស៊ើបអង្កេតលើហេតុការណ៍នេះត្រូវបានចាប់ផ្តើម ខណៈអាជ្ញាធរកំពុងតាមរកមូលហេតុនៃគ្រោះអគ្គិភ័យនេះ៕