ប្រភពដែលដឹងពីកិច្ចសន្ទនាផ្ទៃក្នុងបានប្រាប់សារព័ត៌មានរ៉យទ័រថា ការដកថយរបស់លោកប្រធានាធិបតីអាមេរិក Donald Trump ចេញពីការគំរាមកំហែងរបស់លោក ក្នុងការប្រើកម្លាំងជាម្រើសមួយសម្រាប់ការទទួលបានកោះហ្គ្រីនលែន (Greenland) បានបិទបញ្ចប់ភាពវឹកវរគោលនយោបាយជាច្រើនសប្តាហ៍ ហើយជំហាននេះបានកើតឡើងខណៈដែលជំនួយការជាន់ខ្ពស់ជាច្រើនរូបរបស់លោក បានប្រឹងប្រែងរិះរកវិធីសាស្រ្ត ដើម្បីបំពេញតាមការទាមទាររបស់ប្រធានាធិបតីផង និងបន្ធូរភាពភ័យស្លន់ស្លោក្នុងចំណោមសម្ព័ន្ធមិត្តអាមេរិកផង។

ក្នុងសុន្ទរកថាកាលពីថ្ងៃពុធ (២១ មករា) នៅវេទិកាសេដ្ឋកិច្ចពិភពលោក ទីក្រុងដាវ៉ូស ប្រទេសស្វីស លោក Trump បានច្រានចោលការប្រើប្រាស់កម្លាំងយោធា ហើយនៅក្នុងសារបង្ហោះមួយលើបណ្តាញសង្គម លោកបាននិយាយថា លោកនឹងលែងដាក់ពន្ធដែលលោកបានគំរាមថានឹងចូលជាធរមាននៅថ្ងៃទី១ ខែកុម្ភៈ ទៀតហើយ។

ប្រភពពីសេតវិមានបាននិយាយថា ក្រុមមន្ត្រីសេតវិមាន បានជំរុញឱ្យប្រើវិធីសាស្រ្តដែលមិនសូវញុះញង់ ដោយសមាជិកសំខាន់ៗមួយចំនួននៃក្រុមការងារប្រធានាធិបតី មិនសប្បាយចិត្តចំពោះលទ្ធភាពនៃការប្រើប្រាស់កម្លាំងយោធា ដើម្បីដណ្តើមយកទឹកដីដាណឺម៉ាកនោះទេ។

នៅពេលត្រូវសាកសួរពីរបាយការណ៍ដែលថាជំនួយការលោក Trump មិនចង់ប្រើជម្រើសយោធាលើកោះហ្រ្គីនលែន អ្នកនាំពាក្យសេតវិមាន លោកស្រី Anna Kelly និយាយថា “សេតវិមានមិនច្រានចោលជម្រើសសម្រាប់ប្រធានាធិបតី Trump ទេ លុះត្រាតែលោកធ្វើដូច្នេះដោយខ្លួនឯង”។ អ្នកនាំពាក្យសេតវិមានរូបនេះបន្ថែមថា បន្ថែមថា ប្រសិនបើកិច្ចព្រមព្រៀងមួយត្រូវបានសម្រេច នោះសហរដ្ឋអាមេរិក ក៏នឹងសម្រេចគោលដៅខ្លួននៅហ្រ្គីនលែនផងដែរ ដោយការចំណាយរយៈពេលវែងយ៉ាងតិចតួចបំផុត៕