ប្រជាជននៃកោះហ្គ្រីនលែន (Greenland) បានសម្តែងភាពធូរស្រាលចិត្តយ៉ាងខ្លាំង ប៉ុន្តែក៏នៅតែមានការប្រុងប្រយ័ត្នខ្លះដែរ កាលពីថ្ងៃពុធ (២១ មករា) បន្ទាប់ពីលោកប្រធានាធិបតីអាមេរិក Donald Trump បានច្រានចោលការប្រើប្រាស់កម្លាំងយោធា ដើម្បីដណ្តើមយកកោះអាកទិកមួយនេះមកគ្រប់គ្រង ក្នុងសុន្ទរកថាមួយនៅទីក្រុង Davos ប្រទេសស្វីស ខណៈលោកក៏បានប្រកាសពីការឈានដល់កិច្ចព្រមព្រៀងលើអនាគតកោះស្វយ័តរបស់ដាណឺម៉ាក មួយនេះផងដែរ។

អ្នកស្រុកមួយចំនួនបាននិយាយថា សុន្ទរកថានេះធ្វើឱ្យមាន «ការធូរស្រាលចិត្តយ៉ាងខ្លាំង» បន្ទាប់ពីក្ដីបារម្ភអស់ជាច្រើនខែ ប៉ុន្តែក៏បានព្រមានដែរថា «អ្នកមិនឡើយថាលោក Trump នឹងធ្វើអ្វីបន្ទាប់»។ អ្នកស្រុកផ្សេងទៀតបានសម្ដែងរំភើបរីករាយចំពោះការសន្យានេះ ប៉ុន្តែក៏នៅតែ «ត្រៀមខ្លួនសម្រាប់រឿងអាក្រក់បំផុត» ដោយខ្លាចថា ប្រធានាធិបតីអាមេរិករូបនេះ «នៅតែចង់យកហ្រ្គីនលែន»។

លោក Trump បាននិយាយកាលពីថ្ងៃពុធថា លោកនឹងមិនដណ្តើមយកកោះហ្រ្គីនលែន ដោយប្រើកម្លាំងនោះទេ ប៉ុន្តែលោកក៏បានប្រកាន់ខ្ជាប់យ៉ាងម៉ឺងម៉ាត់ចំពោះការទាមទាររបស់លោក សម្រាប់ការគ្រប់គ្រងលើទឹកដីដាណឺម៉ាកមួយនេះ ក្នុងអំឡុងពេលថ្លែងសុន្ទរកថាទីក្រុង Davos ហើយបានបង្ហើបពីផលវិបាក ប្រសិនបើមហិច្ឆតារបស់លោក ត្រូវបានរារាំង។

ទោះបីជាលោកបានដកការគំរាមកំហែងនៃការប្រើប្រាស់កម្លាំងចេញពីតុពិភាក្សាសម្រាប់ហ្រ្គីនលែនក៏ដោយ ប៉ុន្តែលោក Trump បានអួតសរសើរពីអំណាចយោធារបស់សហរដ្ឋអាមេរិក ដោយលើកឡើងពីប្រតិបត្តិការថ្មីៗនេះ ដូចជាការបណ្តេញលោក Nicolas Maduro របស់វ៉េណេស៊ុយអេឡា ចេញពីតំណែងដ៏គួរឱ្យភ្ញាក់ផ្អើល កាលពីដើមខែនេះ៕