នៅថ្ងៃព្រហស្បតិ៍ (២២ មករា) នេះ តុលាការជាន់ខ្ពស់ទីក្រុងហុងកុង បានចាប់ផ្តើមសវនាការស្តីពីការកាត់ក្តីសន្តិសុខជាតិដ៏សំខាន់មួយ លើអតីតមេដឹកនាំ ៣នាក់នៃក្រុមមួយ ដែលឥឡូវនេះត្រូវបានរំសាយទៅហើយ ដោយក្រុមនោះបានរៀបចំពិធីរំលឹកខួបប្រចាំឆ្នាំ ដើម្បីរំលឹកដល់ការបង្ក្រាបរបស់ទីក្រុងប៉េកាំង នៅទីលានចតុរង្គធានអានមិន (Tiananmen) ឆ្នាំ១៩៨៩ លើក្រុមបាតុករគាំទ្រលទ្ធិប្រជាធិបតេយ្យ។

ប្រទេសចិន បានដាក់ចេញច្បាប់សន្តិសុខជាតិដ៏តឹងរ៉ឹងនៅឆ្នាំ២០២០។ ពិធីរំលឹកវិញ្ញាណក្ខន្ធនៅហុងកុង សម្រាប់ព្រឹត្តិការណ៍ថ្ងៃទី៤ ខែមិថុនា ឆ្នាំ១៩៨៩ នោះ មិនដែលកើតឡើងទៀតទេ ចាប់តាំងពីពេលនោះមក។ ទីក្រុងប៉េកាំងនិយាយថា ច្បាប់សន្តិសុខជាតិរបស់ហុងកុង គឺចាំបាច់ដើម្បីស្តារសណ្តាប់ធ្នាប់ឡើងវិញ បន្ទាប់ពីការតវ៉ាដោយហិង្សាខ្លះ បានធ្វើឱ្យរង្គោះរង្គើទីក្រុងនេះក្នុងឆ្នាំ២០១៩។

ក្រោមច្បាប់សន្តិសុខជាតិ អតីតមេដឹកនាំទាំង ៣នាក់នៃក្រុមនោះ ដែលអ្នកទីមួយឈ្មោះថា Lee Cheuk-yan អាយុ ៦៨ឆ្នាំ អ្នកទី២ឈ្មោះ Albert Ho អាយុ ៧៤ឆ្នាំ និងម្នាក់ចុងក្រោយឈ្មោះ Chow Hang-tung អាយុ ៤០ឆ្នាំ ឥឡូវនេះ ប្រឈមមុខនឹងការចោទប្រកាន់ពីបទ «ញុះញង់ឱ្យមានការផ្តួលរំលំអំណាចរដ្ឋ» ដែលអាចផ្តន្ទាទោសឱ្យជាប់ពន្ធនាគាររហូតដល់ ១០ឆ្នាំ។

អ្នកស្រី Chow និងលោក Lee បានផ្ដល់ចម្លើយពីភាពគ្មានទោស ខណៈលោក Ho បានសារភាពកំហុស។ ការកាត់ក្តីនេះគឺជាករណីមួយក្នុងចំណោមករណីសំខាន់ៗចុងក្រោយមួយចំនួននៃទីក្រុងហុងកុង៕