តម្លៃប្រេងបានមើលឃើញភាពធូរស្រាលនៅថ្ងៃព្រហស្បតិ៍ (២២ មករា) នេះ បន្ទាប់ពីលោកប្រធានាធិបតីអាមេរិក Donald Trump បានបន្ថយភាពតានតឹងជាមួយអឺរ៉ុប ជុំវិញតម្រូវការរបស់លោកសម្រាប់តំបន់ហ្រ្គីនលែន (Greenland) ខណៈការរំខានដល់បណ្ដាញផ្គត់ផ្គង់ពីវាលប្រេងធំៗពីរនៅកាហ្សាក់ស្ថាន និងចក្ខុវិស័យតម្រូវការកាន់តែប្រសើរសម្រាប់ឆ្នាំ២០២៦ ក៏បានផ្តល់ការគាំទ្រដល់តម្លៃប្រេងសកល។

ប្រេងឆៅប្រភេទ Brent បានកើនឡើង ៩សេន ឬ ០,១៤% ដល់តម្លៃ ៦៥,៣៣ ដុល្លារក្នុងមួយបារ៉ែល គិតត្រឹមការជួញដូរពេលព្រឹកព្រលឹមថ្ងៃព្រហស្បតិ៍នេះ ខណៈប្រេងឆៅ WTI របស់សហរដ្ឋអាមេរិក សម្រាប់ខែមីនា បានកើនឡើង ១៣សេន ឬ ០,២១% ដល់តម្លៃ ៦០,៧៥ ដុល្លារក្នុងមួយបារ៉ែល។

កាលពីថ្ងៃពុធ លោក Trump បានលើកឡើងថា កិច្ចព្រមព្រៀងមួយកំពុងត្រូវបានមើលឃើញលើកោះហ្រ្គីនលែន ដែលជាទឹកដីស្វយ័តរបស់ដាណឺម៉ាក ខណៈលោកបានច្រានចោលការប្រើប្រាស់កម្លាំងលើកោះនេះ ដើម្បីបញ្ចប់ជម្លោះដែលប្រថុយនឹងភាពបែកបាក់ដ៏អាក្រក់បំផុត ក្នុងទំនាក់ទំនងឆ្លងមហាសមុទ្រអាត្លង់ទិក ក្នុងរយៈពេលជាច្រើនទសវត្សរ៍។

ប្រធានអ្នកស្រាវជ្រាវផ្នែកថាមពល និងសារធាតុគីមីនៅក្រុមហ៊ុនចិន China Futures Co Ltd បាននិយាយថា កិច្ចព្រមព្រៀងស្តីពីកោះហ្គ្រីនលែន នឹងកាត់បន្ថយហានិភ័យអវិជ្ជមានពីសង្គ្រាមពាណិជ្ជកម្មរវាងសហរដ្ឋអាមេរិក និងអឺរ៉ុប ហើយជំហាននេះគាំទ្រដល់សេដ្ឋកិច្ចពិភពលោក និងតម្រូវការប្រេង៕