ប្រទេសកូរ៉េខាងត្បូង នៅថ្ងៃព្រហស្បតិ៍ (២២ មករា) នេះ បានដាក់ចេញនូវអ្វីដែលខ្លួនហៅថាជា ច្បាប់ដ៏ទូលំទូលាយដំបូងគេបង្អស់ក្នុងពិភពលោក ដែលគ្រប់គ្រងបញ្ញាសិប្បនិម្មិត AI ក្រោមគោលបំណងពង្រឹងទំនុកចិត្ត និងសុវត្ថិភាពក្នុងវិស័យនេះ ប៉ុន្តែក្រុមហ៊ុនទើបចាប់ផ្តើមអាជីវកម្មមានក្ដីបារម្ភថា បន្ទុកនៃការអនុលោមតាមច្បាប់ អាចរារាំងពួកគេមិនឱ្យឈានទៅមុខឆាប់រហ័ស។

ទីក្រុងសេអ៊ូល សង្ឃឹមថា ច្បាប់ AI ថ្មី នឹងដាក់កូរ៉េខាងត្បូង ឱ្យក្លាយជាអ្នកដឹកនាំក្នុងវិស័យនេះ។ ច្បាប់នេះបានចាប់ផ្តើមមានប្រសិទ្ធភាពនៅកូរ៉េខាងត្បូង លឿនជាងកិច្ចប្រឹងប្រែងស្រដៀងគ្នានៅអឺរ៉ុប ដែលច្បាប់ AI របស់សហភាពអឺរ៉ុប កំពុងត្រូវបានអនុវត្តជាដំណាក់កាលនៅឡើយ រហូតដល់ឆ្នាំ២០២៧។

ការខ្វែងគំនិតទូទាំងពិភពលោកនៅតែមាន លើរបៀបគ្រប់គ្រងបញ្ញាសិប្បនិម្មិត AI ដោយសហរដ្ឋអាមេរិក ពេញចិត្តវិធីសាស្រ្តមិនសូវតឹងតែង ដើម្បីជៀសវាងការរារាំងគំនិតច្នៃប្រឌិត។ ចិន បានដាក់ចេញនូវច្បាប់មួយចំនួន និងបានស្នើឱ្យបង្កើតស្ថាប័នមួយ ដើម្បីសម្របសម្រួលបទប្បញ្ញត្តិ AI សកល។

លក្ខណៈពិសេសមួយនៃច្បាប់កូរ៉េខាងត្បូងនេះ គឺតម្រូវឱ្យក្រុមហ៊ុននានា ធានាថា មានការត្រួតពិនិត្យពីមនុស្ស ក្នុងអ្វីដែលហៅថា "AI ដែលមានផលប៉ះពាល់ខ្ពស់" រួមមានវិស័យសំខាន់ៗដូចជា សុវត្ថិភាពនុយក្លេអ៊ែរជាដើម។ ការពិន័យចំពោះការមិនអនុលោមតាមច្បាប់នេះ មានទម្រង់ផ្សេងៗគ្នា ដូចជា ការខកខានមិនដាក់ស្លាកសម្គាល់ថា «បង្កើតឡើងដោយ AI» អាចធ្វើឱ្យក្រុមហ៊ុនមួយប្រឈមការពិន័យជាប្រាក់រហូតដល់ ៣០លានវ៉ុន (ប្រមាណ ២០.៤០០ដុល្លារអាមេរិក)៕