ក្រុមព្យាករបាននិយាយថា ជនជាតិអាមេរិករាប់លាននាក់ ចាប់ពីរដ្ឋ New Mexico រហូតដល់រដ្ឋ Carolina ទាំងពីរ កំពុងត្រៀមខ្លួនសម្រាប់ព្យុះទឹកកកដ៏មហន្តរាយមួយ ដែលអាចនឹងមានឥទ្ធិពលបំផ្លាញខ្លាំង និងអាចផ្តាច់ចរន្តអគ្គិសនីជាច្រើនថ្ងៃ ខណៈនៅរដ្ឋភាគខាងជើងជាច្រើន រហូតដល់រដ្ឋ New England អាចមើលឃើញព្រិលក្រាស់ៗដែលអាចធ្វើឱ្យការធ្វើដំណើរស្ទើរតែមិនអាចទៅរួច។

សេវាអាកាសធាតុជាតិរបស់សហរដ្ឋអាមេរិក បាននិយាយកាលពីថ្ងៃពុធ (២១ មករា) ថា មនុស្សប្រមាណ ១០០លាននាក់ ស្ថិតនៅក្រោមការឃ្លាំមើល ការព្រមាន ឬសេចក្ដីណែនាំអំពីអាកាសធាតុរដូវរងាធ្ងន់ធ្ងរមួយចំនួន មុនពេលព្យុះមកដល់នៅចុងសប្ដាហ៍នេះ។

ក្រុមព្យាកររំពឹងថា ព្យុះនឹងចាប់ផ្តើមនៅថ្ងៃសុក្រ ហើយបន្តរហូតដល់ចុងសប្តាហ៍ ដែលនឹងនាំមកនូវព្រិលធ្លាក់ខ្លាំង និងបញ្ហារដូវរងាគ្រប់ប្រភេទ រួមទាំងភ្លៀងដ៏ត្រជាក់ និងសំណុំទឹកកកធ្លាក់ផងដែរ។ ផ្នែកខ្លះនៃរដ្ឋយ៉ាងហោចណាស់ចំនួន ១៩រដ្ឋ ដែលស្ថិតលើផ្លូវព្យុះព្រិលនេះ បានរងការឃ្លាំមើល ដោយសេចក្ដីណែនាំ និងការព្រមានជាច្រើនទៀតអាចនឹងត្រូវដាក់ចេញ នៅពេលប្រព័ន្ធនេះខិតជិតមកដល់។

ការព្យាកររបស់សេវាអាកាសធាតុជាតិ បានព្រមានពីលទ្ធភាពនៃទឹកកកធ្លាក់ កម្រាស់កន្លះអ៊ីញ ឬច្រើនជាងនេះ សម្រាប់តំបន់ជាច្រើន រួមទាំងផ្នែកខ្លះនៃរដ្ឋ Arkansas រដ្ឋ Louisiana រដ្ឋ Alabama និងរដ្ឋ Tennessee។ បរិមាណទឹកកកកន្លះអ៊ីញនេះ អាចនាំឱ្យមានព្យុះសំណុំទឹកកកដ៏ខ្លាំងក្លា បំបាក់ដើមឈើ និងខ្សែភ្លើង ដែលអាចនាំឱ្យដាច់ចរន្តអគ្គិសនីយ៉ាងទូលំទូលាយ និងមានរយៈពេលយូរ៕