អាជ្ញាធរការពារជាតិ បាននិយាយថា ទាហានស៊ីរី ៧នាក់ បានស្លាប់ និង ២០នាក់ផ្សេងទៀត រងរបួស កាលពីថ្ងៃពុធ នៅពេលដែលយានដ្រូនអត្តឃាតមួយគ្រឿង បានវាយប្រហារតំបន់មួយក្បែរច្រកព្រំដែន al-Yaarubiyah ក្នុងខេត្ត Hasakah ភាគឦសានប្រទេសស៊ីរី ជាកន្លែងដែលអង្គភាពកងទ័ព បានរកឃើញកន្លែងផលិតគ្រាប់បែក និងដ្រូនអត្តឃាត។ 

នៅក្នុងសេចក្តីថ្លែងការណ៍មួយដែលផ្សាយដោយទូរទស្សន៍រដ្ឋ Al-Ikhbariya អាជ្ញាធរបាននិយាយថា កងកម្លាំងយោធា បានរកឃើញរោងចក្រមួយដែលត្រូវបានប្រើសម្រាប់ផលិតគ្រឿងផ្ទុះកែច្នៃ និងបំពាក់អាវុធដល់យានដ្រូន។ យោងតាមសេចក្តីថ្លែងការណ៍បានឲ្យដឹងថា ទីតាំងនេះមានផ្ទុកដ្រូនជាច្រើនគ្រឿង កំពុងត្រូវបានរៀបចំដោយកងកម្លាំងប្រជាធិបតេយ្យស៊ីរី (SDF) ដែលដឹកនាំដោយជនជាតិឃើដ។

ពួកគេបាននិយាយថា បន្ទាប់ពីកងទ័ពបានចាប់ផ្តើមធានាសុវត្ថិភាព និងបោសសម្អាតទីតាំងនោះ វាត្រូវបានកំណត់គោលដៅដោយយានដ្រូនផ្ទុកដោយគ្រឿងផ្ទុះ ដែលបានវាយប្រហារដោយកងកម្លាំងប្រជា    ធិបតេយ្យស៊ីរី ( SDF) បានបង្កឲ្យមានការផ្ទុះដ៏ខ្លាំងក្លាមួយ ដោយបានបណ្តាលឲ្យទាហានដែលឈរជើងនៅក្បែរនោះ ស្លាប់និងរបួស។

ការវិវឌ្ឍនេះ បានកើតឡើង ចំពេលមានភាពតានតឹងកាន់តែខ្លាំងឡើងនៅភាគខាងជើង និងភាគខាងកើតប្រទេសស៊ីរី បន្ទាប់ពីកិច្ចព្រមព្រៀងដ៏ផុយស្រួយរវាងរដ្ឋាភិបាលបណ្តោះអាសន្នស៊ីរី និង SDF ដែលរួមមានការរៀបចំបទឈប់បាញ់ ការដកកងទ័ព និងការវិលត្រឡប់ទៅគ្រប់គ្រងអំណាចរដ្ឋជាបណ្តើរៗ។

កាលពីថ្ងៃអង្គារ (ទី ២០ ខែមករា) រដ្ឋាភិបាលបណ្តោះអាសន្នស៊ីរី បានប្រកាសបទឈប់បាញ់រយៈពេល ៤ថ្ងៃ ដើម្បីគាំទ្រដល់ការចរចាជាមួយ SDF  អំពីការរៀបចំសន្តិសុខ និងការធ្វើសមាហរណកម្មយោធាដែលអាចកើតមាន៕