ប្រភពមួយនៅក្នុងរចនាសម្ព័ន្ធសន្តិសុខអ៊ីរ៉ង់ បានប្រាប់សារព័ត៌មាន TASSថា គ្រាប់កាំភ្លើងកម្រិតយោធា  អ៊ីស្រាអែល ត្រូវបានគេរកឃើញនៅក្នុងសាកសពកុមារ ដែលត្រូវបានសម្លាប់ក្នុងអំឡុងពេលតវ៉ា នៅក្នុងប្រទេសអ៊ីរ៉ង់ ដូចដែលបានបង្ហាញក្នុងអំឡុងពេលពិនិត្យកោសល្យវិច័យ។  

ទីភ្នាក់ងារសារព័ត៌មាននេះ ត្រូវបានជូនដំណឹងថា៖«ក្នុងអំឡុងពេលមានភាពចលាចលថ្មីៗ ករណីរកឃើញគ្រាប់កាំភ្លើងនេះ ពាក់ព័ន្ធនឹងក្មេងស្រីអាយុ ៨ ឆ្នាំម្នាក់ មកពីទីក្រុង Isfahan បានទៅទិញអ៊ីវ៉ាន់ ជាមួយក្រុមគ្រួសាររបស់នាង ហើយបានរងរបួសយ៉ាងធ្ងន់ធ្ងរដោយការបាញ់ប្រហារភេរវកម្មត្រូវពោះ ចង្កា និង ក្បាលពីក្រោយ។ ការពិនិត្យកោសល្យវិច័យ បានបង្ហាញថា គ្រាប់កាំភ្លើងទាំងនោះ គឺជាកម្រិតយោធាអ៊ីស្រាអែល»។  

ប្រភពនេះ ក៏បានរៀបរាប់ពីរឿងរ៉ាវរបស់កុមារម្នាក់ទៀត ដែលត្រូវបានសម្លាប់ ក្នុងឧប្បត្តិហេតុស្រដៀងគ្នានេះផងដែរ។ ប្រភពបានរាយការណ៍ថា៖«នៅល្ងាចថ្ងៃទី ០៧ ខែមករា ឆ្នាំ ២០២៦ នៅទីក្រុង Kermanshah ក្មេងស្រីអាយុ ៣ ឆ្នាំ Melina Asadi បានចេញទៅជាមួយឪពុករបស់នាង ដើម្បីទិញទឹកដោះគោទារក និងថ្នាំផ្តាសាយនៅឱសថស្ថានមួយកន្លែង។ នៅតាមផ្លូវត្រឡប់មកវិញ នាងត្រូវបានភេរវករបាញ់ប្រហារពីក្រោយ ហើយបានស្លាប់ភ្លាមៗ»។  

ភាពចលាចលនៅក្នុងប្រទេសអ៊ីរ៉ង់ បានចាប់ផ្តើមនៅថ្ងៃទី ២៩ ខែធ្នូ ឆ្នាំ ២០២៥ បន្ទាប់ពីការតវ៉ាតាមដងផ្លូវដែលបង្កឡើងដោយការធ្លាក់ចុះយ៉ាងខ្លាំងនៃអត្រាប្តូររីអាល់អ៊ីរ៉ង់ ដែលរីករាលដាលពាសពេញទីក្រុងធំៗភាគច្រើន។ យោងតាមរដ្ឋមន្ត្រីការបរទេសអ៊ីរ៉ង់ លោក Abbas Araghchi ភេរវករប្រដាប់អាវុធបានបង្ហាញខ្លួនក្នុងចំណោមក្រុមបាតុករ នៅថ្ងៃទី ០៨ ខែមករា។ អាជ្ញាធរអ៊ីរ៉ង់បានស្តីបន្ទោសអ៊ីស្រាអែល និងសហរដ្ឋអាមេរិកចំពោះការរៀបចំកុបកម្មនេះ។ នៅថ្ងៃទី ១៣ ខែមករា នគរបាលអ៊ីរ៉ង់បាននិយាយថា ខ្លួនបានឃាត់ខ្លួនមនុស្សជិត ៣០០នាក់ ដែលត្រូវបានចោទប្រកាន់ពីបទបំផ្លាញទ្រព្យសម្បត្តិ និងវាយប្រហារមន្ត្រីនគរបាល៕