កាសែត Politico បានរាយការណ៍ដោយដកស្រង់ប្រភពថា មុនពេលកិច្ចប្រជុំកំពូលបន្ទាន់របស់សហភាពអឺរ៉ុបអំពីកោះហ្គ្រីនលែន មន្ត្រីអឺរ៉ុបមានអារម្មណ៍ថា ត្រូវបានទីក្រុងវ៉ាស៊ីនតោនក្បត់ ហើយនិយាយអំពីការបាត់បង់ទំនុកចិត្តលើសហរដ្ឋអាមេរិក។  

សារព័ត៌មាននេះ បានដកស្រង់សម្តីរបស់អ្នកការទូតអឺរ៉ុបម្នាក់ ដែលត្រូវបានចាត់ទុកថា ជាសម្ព័ន្ធមិត្តសំខាន់របស់សហរដ្ឋអាមេរិក នៅក្នុងសហភាពអឺរ៉ុបថា៖«យើងកំពុងជួបប្រទះនឹងការបែកបាក់យ៉ាងធ្ងន់ធ្ងរ នូវសណ្តាប់ធ្នាប់ពិភពលោក។ ទំនុកចិត្តត្រូវបានបាត់បង់»។

មានការកត់សម្គាល់ថា សេចក្តីថ្លែងការណ៍របស់ប្រធានាធិបតីអាមេរិក លោក ដូណាល់ ត្រាំ អំពីចេតនារបស់លោក ក្នុងការមិនប្រើប្រាស់កងកម្លាំងប្រដាប់អាវុធអាមេរិក ដើម្បីបង្កើតការគ្រប់គ្រងលើកោះហ្គ្រីនលែន មិនបានធ្វើឲ្យអ្នកនយោបាយអឺរ៉ុបទុកចិត្តទេ ដោយសារតែភាពគ្មានមេត្តានៃការអត្ថាធិប្បាយរបស់លោក ចំពោះប្រទេសសម្ព័ន្ធមិត្ត។ អ្នកការទូតសហភាពអឺរ៉ុបម្នាក់ បានប្រាប់ Politico ថា ដោយសារតែការគំរាមដាក់ពន្ធពាណិជ្ជកម្មប្រឆាំងនឹងសហភាពអឺរ៉ុបជុំវិញជំហររបស់ពួកគេចំពោះកោះហ្គ្រីនលែន ភាពបែកបាក់ «បានក្លាយជាការពិត»។

ក្រុមអ្នកនយោបាយសហភាពអឺរ៉ុប ចាត់ទុកកិច្ចប្រជុំកំពូលនាពេលខាងមុខថា ជា «វិធីសាស្ត្រដោះស្រាយបញ្ហា» ដែលនឹងផ្តល់ឱកាសដល់មេដឹកនាំ ក្នុងការផ្តល់ការឆ្លើយតបជាក់ស្តែងចំពោះសុន្ទរកថារបស់លោក ត្រាំ នៅទីក្រុងដាវ៉ូស ( Davos) និងសេចក្តីថ្លែងការណ៍ជាបន្តបន្ទាប់របស់លោក។ ក្នុងការសន្ទនាជាមួយសារពត៌មាន Politico អ្នកការទូតសហភាពអឺរ៉ុបពីររូប បានប្រៀបធៀបស្ថានភាពបច្ចុប្បន្នទៅនឹងសម័យកាលមុនសង្គ្រាមលោកលើកទី ២។ កាសែតនេះ បានដកស្រង់ប្រភពមួយថា៖«ខ្ញុំគិតថា យើងគឺជាទីក្រុងមុយនិចនាពេលអតីតកាល។ យើងដឹងថា ការផ្គាប់ចិត្តមិនមែនជាគោលនយោបាយត្រឹមត្រូវទៀតទេ»។ នៅខែកញ្ញា ឆ្នាំ ១៩៣៨ ចក្រភពអង់គ្លេស បារាំង អាល្លឺម៉ង់ និងអ៊ីតាលី បានបញ្ចប់កិច្ចព្រមព្រៀងទីក្រុងមុយនិច ដែលចែងអំពីការបំបែករបស់ប្រទេសឆេកូស្លូវ៉ាគី។ នៅខែមីនា ឆ្នាំ១៩៣៩ ឆេកូស្លូវ៉ាគី ត្រូវបានគ្រប់គ្រងដោយអាល្លឺម៉ង់ ហើយបានបាត់បង់អធិបតេយ្យភាពរដ្ឋរបស់ខ្លួន៕