ក្រសួងការពារជាតិនិយាយថា នាយករដ្ឋមន្ត្រីប្រទេសអ៊ីរ៉ាក់ លោក Mohammed Shia al Sudani បានធ្វើទស្សនកិច្ចនៅមូលដ្ឋានកងទ័ពអាកាស Ain al Asad ក្នុងខេត្ត Anbar កាលពីថ្ងៃពុធ ទី២១ ខែមករា បន្ទាប់ពីការដកកងទ័ពសហរដ្ឋអាមេរិកចេញទាំងស្រុង និងបានប្រគល់មូលដ្ឋានទ័ពទៅឲ្យកងកម្លាំងអ៊ីរ៉ាក់វិញកាលពីថ្ងៃសៅរ៍ ទី១៧ ខែមករា។

នៅឆ្នាំ២០២៤ ទីក្រុងវ៉ាស៊ីនតោន និងទីក្រុងបាកដាដ បានឈានដល់ការយោគយល់លើផែនការសម្រាប់ការដកកងទ័ពចម្រុះដឹកនាំដោយសហរដ្ឋអាមេរិកចេញពីប្រទេសអ៊ីរ៉ាក់ និងការផ្លាស់ប្តូរឆ្ពោះទៅរកទំនាក់ទំនងសន្តិសុខទ្វេភាគី។

មូលដ្ឋាន Ain al-Asad បានទទួលកងទ័ពសហរដ្ឋអាមេរិក និងកងទ័ពចម្រុះរយៈពេលជាច្រើនឆ្នាំមកហើយ ហើយត្រូវបានដាក់គោលដៅដដែលៗដោយក្រុមប្រដាប់អាវុធគាំទ្រដោយអ៊ីរ៉ង់ ក្នុងអំឡុងភាពតានតឹងក្នុងតំបន់កាន់តែខ្លាំងឡើង រួមទាំងក្រោយការសម្លាប់ឧត្តមសេនីយ៍អ៊ីរ៉ង់ លោក Qassem Soleimani ដោយសហរដ្ឋអាមេរិក កាលពីឆ្នាំ២០២០។

លោក Sudani ក៏បានធ្វើទស្សនកិច្ចទៅកាន់តំបន់មួយក្បែរព្រំដែនប្រទេសអ៊ីរ៉ាក់-ស៊ីរី ជាកន្លែងដែលលោកបានជួបជាមួយមេបញ្ជាការយោធាដើម្បីពិភាក្សាអំពីស្ថានភាពសន្តិសុខ និងការត្រៀមខ្លួនរបស់កងកម្លាំងនៅតាមព្រំដែន។