នៅថ្ងៃព្រហស្បតិ៍នេះ បង់ក្លាដែសបានចាប់ផ្តើមយុទ្ធនាការផ្លូវការ សម្រាប់ការបោះឆ្នោតសកលនៅខែក្រោយ ដែលជាការបោះឆ្នោតលើកដំបូង ចាប់តាំងពីការបះបោរឆ្នាំ ២០២៤ បញ្ចប់ការគ្រប់គ្រងបែបផ្តាច់ការរបស់លោកស្រី Sheikh Hasina ។

ក្រុមអ្នកគាំទ្ររាប់ម៉ឺននាក់របស់បេក្ខជនឈានមុខគេ Tarique Rahmanមកពីគណបក្សជាតិនិយមបង់ក្លាដែស(BNP) បានជួបជុំគ្នាតាមដងផ្លូវនៅទីក្រុងភាគខាងជើង Sylhet ដោយពួកគេនាំគ្នាស្រែកឈ្មោះរបស់លោក ។ 

ក្រុមស្មោះស្ម័គ្ររបស់គណបក្ស BNP ដែលនាំគ្នាកាន់បដាមានរូបថតរបស់លោក Rahman បន្ទាប់ពីរូបលោកបានវិលត្រឡប់មកកាន់ប្រទេសបង់ក្លាដែសវិញកាលពីខែធ្នូ ឆ្នាំ ២០២៥ ក្រោយនិរទេសខ្លួនអស់រយៈពេល ១៧ឆ្នាំ បានស្រែកថា តើពួកយើងមានមេដឹកនាំដែរឬទេ? បាទពួកយើងពិតជាមាន ។

ចំណែកឯគណបក្សអ៊ិស្លាមធំបំផុត Jamaat-e-Islami នឹងចាប់ផ្តើមយុទ្ធនាការបោះឆ្នោតរបស់ពួកគេផងដែរនៅរដ្ឋធានី Dhaka នៅថ្ងៃដដែលនេះ ។

 ប្រទេសអាស៊ីខាងត្បូងមានពលរដ្ឋ ១៧០លាននាក់មួយនេះ នឹងបោះឆ្នោតនៅថ្ងៃទី ១២ ខែកុម្ភៈ ដើម្បីជ្រើសរើសតំណាងរាស្រ្ត ៣៥០នាក់ ។

 ការបោះឆ្នោតនេះដែរ ត្រូវបានគេរំពឹងថានឹងនាំមកជាមួយថ្នាក់ដឹកនាំថ្មី ក្រោយភាពចលាចលរយៈពេលយូរ បន្ទាប់ពីការផ្តួលរំលំរដ្ឋាភិបាលរបស់លោកស្រី Hasina ជាការកែសម្រួលនយោបាយក្នុងស្រុក និងសក្ដានុភាពក្នុងតំបន់ ។

 វាកើតមានឡើង បន្ទាប់ពីអសន្តិសុខ រួមទាំងឃាតកម្មកាលពីខែមុនលើមេដឹកនាំនិស្សិតម្នាក់នៅក្នុងបាតុកម្មប្រឆាំងលោកស្រី Hasina ក៏ដូចជាការព្រមានពីព័ត៌មានមិនពិតនៅតាមអនឡាញ ។

ក្រុមសង្កេតការបោះឆ្នោតសហភាពអឺរ៉ូប និយាយថា ការបោះឆ្នោតនេះ នឹងក្លាយជាដំណើការប្រជាធិបតេយ្យធំបំផុតប្រចាំឆ្នាំ ២០២៦ ៕