ការស្ទង់មតិមួយ បានបង្ហាញនៅថ្ងៃព្រហស្បតិ៍ (ទី២២ ខែមករា ឆ្នាំ២០២៦) នេះថា ការនាំមុខរបស់គណបក្សប្រឆាំងដ៏ធំរបស់ហុងគ្រី គឺ Tisza លើគណបក្ស Fidesz របស់លោកនាយករដ្ឋមន្ត្រី Viktor Orban បានធ្លាក់ចុះបន្តិចនៅក្នុងខែមករានេះ មុនការបោះឆ្នោតនៅថ្ងៃទី១២ ខែមេសា ដែលលោក Orban ប្រឈមនឹងការប៉ុនប៉ងដ៏លំបាក ដើម្បីជាប់ឆ្នោតឡើងវិញ។

អ្នកនយោបាយជាតិនិយម លោក Orban ដែលកាន់អំណាចចាប់តាំងពីឆ្នាំ២០១០ កំពុងប្រឈមនឹងគូប្រជែងដ៏ខ្លាំងជាលើកដំបូង នៅក្នុងការបោះឆ្នោត ដោយលទ្ធផលមានផលវិបាកយ៉ាងធំ មិនត្រឹមតែសម្រាប់ហុងគ្រីប៉ុណ្ណោះទេ ប៉ុន្តែថែមទាំងសម្រាប់អឺរ៉ុប និងកម្លាំងនយោបាយស្តាំនិយមជ្រុលរបស់ខ្លួនផងដែរ។

ការស្ទង់មតិភាគច្រើន បង្ហាញថា គណបក្ស Fidesz តាមពីក្រោយគណបក្ស Tisza ទោះបីជាមានវិធានការបំពេញចិត្តអ្នកបោះឆ្នោតក៏ដោយ ដោយសារសេដ្ឋកិច្ចនៅទ្រឹងរយៈពេល ៣ឆ្នាំ។ តែស្ថាប័នស្ទង់មតិគាំទ្ររដ្ឋាភិបាល បង្ហាញពីការនាំមុខរបស់គណបក្ស Fidesz។ ការស្ទង់មតិ ២ផ្សេងទៀត កាលពីសប្តាហ៍មុន បានបង្ហាញថា គណបក្ស Tisza ពង្រីកការនាំមុខរបស់ខ្លួនលើបក្ស Fidesz។

ស្ថាប័នស្ទង់មតិ Republikon បានឲ្យដឹងថា គណបក្ស Tisza ដែលជាក្រុមកណ្តាល-ស្តាំនិយមដឹកនាំដោយអតីតអ្នកនៅខាងក្នុងរដ្ឋាភិបាល លោក Peter Magyar មានការនាំមុខ ៩ពិន្ទុលើគណបក្ស Fidesz ដោយបានធ្លាក់ចុះពីកម្រិតនាំមុខ ១២ពិន្ទុ អំឡុងការស្ទង់មតិខែធ្នូ ក្នុងចំណោមអ្នកបោះឆ្នោតដែលបានសម្រេចចិត្ត។

គណបក្សរបស់លោក Magyar ដែលទើបតែបង្កើតឡើងក្នុងឆ្នាំ២០២៤ ទទួលបានការគាំទ្រពីអ្នកបោះឆ្នោតដែលបានសម្រេចចិត្តចំនួន ៤៧ភាគរយ ដោយធ្លាក់ចុះពីកម្រិត ៤៨ភាករយ កាលពីក្នុងខែធ្នូឆ្នាំមុន៕