រដ្ឋមន្រ្តីក្រសួងសន្តិសុខជាតិអ៊ីស្រាអែលលោក Itamar Ben-Gvir បានអនុម័តការចេញអាជ្ញាប័ណ្ណកាំភ្លើងដល់ការតាំងលំនៅនិគមន៍ខុសច្បាប់ ១៨កន្លែងបន្ថែមទៀត នៅក្នុងតំបន់កាន់កាប់វ៉េសប៊ែង ស្របពេលដែលរដ្ឋាភិបាលស្តំា-ឆ្វេងនិយមរបស់លោកនាយករដ្ឋមន្រ្តី Benjamin Netanyahu ជំរុញឲ្យពង្រីកប៉ុស្តិ៍ក្រៅខុសច្បាប់ដែលធ្វើឲ្យអន្តរាយដល់ទស្សនីយភាពសម្រាប់ដំណោះស្រាយរដ្ឋ ២ ។

លោក Ben-Gvir ដែលជារដ្ឋមន្រ្តីនិយមស្តាំជ្រុល សរសេរនៅលើបណ្តាញព័ត៌មានសង្គម Telegramថា សារៈសំខាន់នៃការសម្រេចចិត្តនេះ គឺផ្អែកលើការពិតថា ការតាំងលំនៅនិគមន៍ទាំងនេះ បច្ចុប្បន្នអាចដាក់ពាក្យសុំអាជ្ញាប័ណ្ណអាវុធផ្ទាល់ខ្លួនបាន ហើយកិច្ចខិតខំនេះដែរ គឺដើម្បីធ្វើឲ្យល្អប្រសើរឡើងស្វ័យការពារ និងបង្កើនសន្តិសុខផ្ទាល់ខ្លួន ។

គួរឲ្យដឹងថា អ្នកតាំងលំនៅអ៊ីស្រាអែល ត្រូវបានលោក Ben-Gvir លើកទឹកចិត្តជាមួយកម្មវិធីសព្វាវុធទ្រង់ទ្រាយធំ នៅពេលចាប់ផ្តើមសង្រ្គាមប្រល័យពូជសាសន៍របស់អ៊ីស្រាអែលក្នុងតំបន់ហ្កាហ្សា ហើយនិងពេលដែលពួកគេគ្មានទោសពៃស្ទើទាំងស្រុង ពេលដែលពួកគេបើកការវាយប្រហារ ។

ពលរដ្ឋអ៊ីស្រាអែលដែលរស់នៅខុសច្បាប់ក្នុងតំបន់កាន់កាប់វ៉េសប៊ែង ត្រូវបានបំពាក់អាវុធកម្រិតយោធា ចាប់ពីកាំភ្លើង M16 ផលិតនៅអាមេរិក រហូតដល់ កាំភ្លើងខ្លី និងយានដ្រូន ។

អាជ្ញាធរអ៊ីស្រាអែលនិយាយការពារថា ការកាន់អាវុធនេះ គឺចាំបាច់សម្រាប់សុវត្ថិភាពរបស់ពួកគេ ប៉ុន្តែអង្គការក្នុងស្រុក និងអន្តរជាតិ បានសរសេរឯកសារពីការជម្លៀសខ្លួនទាំងបង្ខំ និងរៀបចំទុករបស់ប៉ាឡេស្ទីន ចេញពីដីដូនតារបស់ពួកគេ ៕