ក្រសួងការបរទេសឥណ្ឌូនេស៊ីបាននិយាយនៅក្នុងសេចក្តីថ្លែងការណ៍បង្ហោះនៅលើបណ្តាញព័ត៌មានសង្គមនាថ្ងៃព្រហស្បតិ៍នេះថា ឥណ្ឌូនេស៊ីបានចូលរួមជាមួយទួរគី អេហ្ស៊ីប ហ្ស៊កដានី អារ៉ាប៊ីសាអ៊ូឌីត ប៉ាគីស្ថាន និងកាតា ក្នុងការទទួលយកការអញ្ជើញ ដើម្បីចូលរួម “ក្រុមប្រឹក្សាសន្តិភាព”របស់ប្រធានាធិបតីសហរដ្ឋអាមេរិកលោក Donald Trump ។

លោក Trump បានដាក់ឲ្យដំណើរការ “ក្រុមប្រឹក្សាសន្តិភាព” គឺជាអង្គភាពមួយសម្រាប់ដោះស្រាយជម្លោះអន្តរជាតិជាមួយនឹងស្លាកតម្លៃ ១ពាន់លានដុល្លារ សម្រាប់សមាជិកភាពអចិន្រ្តៃយ៍ ។ លោកបានចុះហត្ថលេខានៅទីក្រុង Davos របស់ប្រទេសស្វីស ។

ប្រទេសដែលបានចូលរួមក្រុមប្រឹក្សាសន្តិភាពនេះ រួមមានទាំងសម្ព័ន្ធមិត្តនៅតំបន់មជ្ឈិមបូព៌ារបស់សហរដ្ឋអាមេរិក ដូចជាប្រទេសអ៊ីស្រាអែល អារ៉ាប៊ីសាអ៊ូឌីត អារ៉ាប់រួម បារ៉ែន ហ៊្សកដានី កាតា និងអេហ្ស៊ីប ។ 

រដ្ឋជាសមាជិកអង្គការណាតូ ប្រទេសទួរគី និងហុងគ្រី ដែលមេដឹកនាំជាតិនិយមរបស់ពួកគេបង្កើតទំនាក់ទំនងផ្ទាល់ខ្លួនល្អប្រសើរជាមួយលោក Trumpនោះ បានយល់ព្រមចូលរួមផងដែរ ក៏ដូចជាប្រទេសម៉ារ៉ុក ប៉ាគីស្ថាន ឥណ្ឌូនេស៊ី កូសូវ៉ូ អ៊ូសបេកគីស្ថាន កាហ្សាក់ស្ថាន ប៉ារ៉ាហ្គាយ និងប្រទេសវៀតណាម ។

លោក Trump បានអញ្ជើញក្រុមមេដឹកនាំពិភពលោករាប់សិបនាក់ ឲ្យចូលរួមគំនិតផ្តួចផ្តើមរបស់លោក ដែលមានគោលបំណងដោះស្រាយជម្លោះសកលលោក បើទោះបីជាក្រុមមន្រ្តីការទូតនិយាយថា ការធ្វើបែបនេះ អាចនឹងប៉ះពាល់ដល់ការងាររបស់អង្គការសហប្រជាជាតិក៏ដោយ ។

លោក Trumpបានស្នើសុំដំបូងនូវក្រុមប្រឹក្សាសន្តិភាពកាលពីខែកញ្ញា ឆ្នាំមុន ពេលដែលលោកប្រកាសផែនការបញ្ចប់សង្រ្គាមហ្កាហ្សា ៕