មន្ត្រីបានប្រាប់ឲ្យដឹងថា ព្យុះដ៏ខ្លាំង និងបំណាក់ដីដែលបង្កឡើងដោយទឹកភ្លៀង បានបណ្ដាលឲ្យក្មេងៗយ៉ាងតិច ៩នាក់បាត់បង់ជីវិត នៅភាគខាងត្បូង និងភាគខាងកើតនៃប្រទេសអាហ្វហ្គានីស្ថាន ដោយប្រជាជនកំពុងប្រឈមនឹងគ្រោះថ្នាក់បន្ថែមទៀត នាថ្ងៃព្រហស្បតិ៍ (ទី២២ ខែមករា ឆ្នាំ២០២៦) នេះ ខណៈដែលព្រិលធ្លាក់ខ្លាំង បានកើតមាននៅប្រទេសនេះ។

នាយកដ្ឋានសង្គ្រោះបន្ទាន់ នៅភាគខាងត្បូង បានឲ្យដឹងថា ខ្យល់បក់ខ្លាំង និងភ្លៀងធ្លាក់ខ្លាំង នៅទីក្រុង Kandahar បានសម្លាប់កុមារ ៦នាក់ កាលពីថ្ងៃពុធ និងបានបណ្តាលឲ្យមានការខាតបង់ផ្នែកហិរញ្ញវត្ថុ នៅក្នុងតំបន់ជាច្រើន។ ស្ថាប័ននេះបានបន្ថែមថា ព្យុះក៏បានបំផ្លាញផ្ទះសម្បែងជាច្រើនខ្នងផងដែរ។

នៅក្នុងឧប្បត្តិហេតុដាច់ដោយឡែកមួយ នៅភាគខាងកើតខេត្ត Nuristan បំណាក់ដីដែលបង្កឡើងដោយភ្លៀងធ្លាក់ខ្លាំង បានបំផ្លាញផ្ទះមួយខ្នង នៅក្នុងភូមិ Quraish កាលពីថ្ងៃពុធ ដោយបានឆក់យកជីវិតសមាជិកគ្រួសារតែមួយចំនួន ៣នាក់ និងមានអ្នករបួស ២នាក់ទៀត។

ជាមួយគ្នានេះដែរ នៅឯខេត្ត Ghazni ភាគកណ្តាល អ្នកឆ្លើយឆ្លងព័ត៌មានរបស់សារព័ត៌មាន AFP បានឲ្យដឹងថា មានព្រិលធ្លាក់កម្ពស់ប្រហែល ៨០សង់ទីម៉ែត្រ ក្នុងរយៈពេល ២៤ម៉ោងកន្លងមកនេះ ដែលបង្ខំឲ្យឲ្យមានការបិទផ្សារ និងផ្លូវ។ ព្រិលធ្លាក់ខ្លាំងនៅក្នុងខេត្តជាច្រើននៃប្រទេសអាហ្វហ្គានីស្ថាន និងរដ្ឋធានី Kabul ក៏បានបង្កឲ្យមានគ្រោះថ្នាក់ចរាចរណ៍ផងដែរ។

ប្រទេសអាហ្វហ្គានីស្ថានតែងតែជួបប្រទះនឹងគ្រោះទឹកជំនន់ បំណាក់ដី និងព្យុះកំណាច ជាពិសេសនៅតំបន់ដាច់ស្រយាល ដែលមានហេដ្ឋារចនាសម្ព័ន្ធមិនល្អ ដោយធ្វើសហគមន៍ងាយរងគ្រោះដោយសារអាកាសធាតុអាក្រក់ខ្លាំង៕