មន្រ្តីកងទ័ពឥណ្ឌាយ៉ាងហោច ១០នាក់ បានស្លាប់ និងមនុស្សជាច្រើននាក់ផ្សេងទៀត រងរបួស នាថ្ងៃព្រហស្បតិ៍នេះ ក្រោយរថយន្តក្រុងដឹកពួកគេ បានធ្លាក់ចូលជ្រោះនៅដែនដីសហព័ន្ធចាមមូ និងកាស្មៀ ស្ថិតនៅភាគខាងជើងប្រទេសឥណ្ឌា ។

ឧបទ្ទេវហេតុគ្រោះថ្នាក់នេះ បានកើតឡើងនៅតំបន់ Khani Top ស្ថិតក្នុងទីក្រុង Bhaderwah បន្ទាប់ពីកងទ័ព និងក្រុមរដ្ឋបាលក្នុងស្រុក បានប្រញាប់ប្រញាល់ទៅកាន់កន្លែងកើតហេតុ និងបានចុះប្រតិបត្តិការជួយសង្រ្គោះភ្លាមៗ ។

អ្នករងរបួសទទួលបានការព្យាបាលនៅនឹងកន្លែង និងដឹកជញ្ជូនទៅកាន់មន្ទីរពេទ្យក្នុងស្រុកនៅទីក្រុង Bhadarwah មុនពេលដឹកតាមឧទ្ធម្ភាគចក្រយោធា ទៅកាន់មន្ទីរពេទ្យជំនាញ ។

លោក Manoj Sinha គឺជាអភិបាលរងដែនដីចាមមូ និងកាស្មៀ បានសម្តែងនូវភាពក្រៀមក្រំជាខ្លាំងចំពោះការបាត់បង់អាយុជីវិតមនុស្ស និងសម្តែងនូវមរណទុក្ខដល់គ្រួសារកាន់ទុក្ខ ៕