នគរបាល នៅថ្ងៃព្រហស្បតិ៍ (ទី២២ ខែមករា ឆ្នាំ២០២៦) នេះ បានប្រាប់ឲ្យដឹងថា មនុស្ស ៣នាក់ ត្រូវបានបាញ់បណ្ដាលឲ្យស្លាប់ អំឡុងការវាយប្រហារមួយ នៅក្នុងរដ្ឋ New South Wales របស់ប្រទេសអូស្ត្រាលី ដោយប្រព័ន្ធផ្សព្វផ្សាយក្នុងស្រុក រាយការណ៍ថា ខ្មាន់កាំភ្លើងនៅតែរត់គេចខ្លួន ហើយការបាញ់ប្រហារនេះ គឺជាឧប្បត្តិហេតុដែលសង្ស័យថា ជាអំពើហិង្សាក្នុងគ្រួសារ។

នគរបាលបានប្រាប់ថា ប្រតិបត្តិការមួយកំពុងធ្វើឡើង នៅក្នុងទីក្រុង Lake Cargelligo ដែលមានចម្ងាយប្រហែល ៦១១គីឡូម៉ែត្រ នៅភាគខាងលិចនៃទីក្រុង Sydney ហើយបានជំរុញឲ្យប្រជាជនស្នាក់នៅតែក្នុងផ្ទះ។

ទីភ្នាក់ងារសង្គ្រោះបន្ទាន់ ត្រូវបានហៅទូរសព្ទឲ្យទៅកាន់កន្លែងកើតហេតុ បន្ទាប់ពីមានរបាយការណ៍ អំពីការបាញ់ប្រហារ នាពេលរសៀល។ នគរបាលបានបញ្ជាក់ថា ស្ត្រី ២នាក់ និងបុរសម្នាក់បានបាត់បង់ជីវិត ហើយបុរសម្នាក់ទៀតត្រូវបានបញ្ជូនទៅមន្ទីរពេទ្យក្នុងស្ថានភាពធ្ងន់ធ្ងរ ប៉ុន្តែមានស្ថិរភាព។

នគរបាលបានឲ្យដឹងនៅក្នុងសេចក្តីថ្លែងការណ៍មួយលើបណ្ដាញសង្គមថា៖ «ប្រតិបត្តិការរបស់នគរបាលកំពុងធ្វើឡើងនៅទីក្រុង Lake Cargelligo»។ ពួកគេបានជំរុញឲ្យសាធារណជនជៀសវាងកុំទៅកាន់តំបន់នោះនិងអ្នកស្រុកស្នាក់នៅតែក្នុងផ្ទះ។

សារព័ត៌មាន Sydney Morning Herald បានរាយការណ៍ថា ហេតុការណ៍នេះ គឺជាការវាយប្រហារដែលសង្ស័យថា ជាអំពើហិង្សាក្នុងគ្រួសារ ហើយខ្មាន់កាំភ្លើងម្នាក់ត្រូវបានគេជឿថា បានលាក់ខ្លួននៅក្នុងទីក្រុងនេះ ជាមួយនឹងអាវុធវែងមួយដើម៕