ក្រុមអវកាសយានិកក្នុងបេសកកម្ម Crew-11 របស់ក្រុមហ៊ុន SpaceX បាននិយាយថា ការឆ្លើយតបឆាប់រហ័សពីអង្គការណាសា និងក្រុមហ៊ុន SpaceX បានជំរុញឲ្យមានការវិលត្រឡប់មកវិញមុនពេលកំណត់ដោយសុវត្ថិភាពពីស្ថានីយអវកាសអន្តរជាតិ(ISS) ក្រោយបញ្ហាសុខភាពធ្ងន់ធ្ងរតែមិនបានបញ្ចេញឲ្យដឹង ធ្វើឲ្យប៉ះពាល់ដល់អវកាសយានិកម្នាក់ ។

ថ្លែងនៅក្នុងសន្និសីទសារព័ត៌មាននៅមជ្ឈមណ្ឌលអវកាស Johnson របស់អង្គការណាសា មេបញ្ជាការបេសកកម្ម Crew-11 លោក Zena Cardman និយាយថា អវកាសយានិក ៤រូប បានវិលត្រឡប់មកកាន់ផែនដីវិញមុនផែនការ ប៉ុន្តែលោកពុំបានបញ្ជាក់ពីអវកាសយានិករូបណា ពាក់ព័ន្ធនឹងស្ថានភាពសុខភាពនោះទេ ។

លោក Cardman និយាយថា អ្វីដែលលោកត្រូវនិយាយគឺលោកពិតជាមានមោតនភាពខ្លាំងណាស់ចំពោះវិធីដែលក្រុមអវកាសយានិករបស់ពួកយើង ចេះរួបរួមសាមគ្គីគ្នា ។ 

លោកថា លោកសូមកោតសរសើរដល់ក្រុមអ្នកគ្រប់គ្រងការហោះហើរ ក្រុមគ្រូពេទ្យ និងបុគ្គលិកគាំទ្រនៅលើផែនដី ហើយនៅក្នុងគន្លងតារាវិថី សម្រាប់ការងាររួមគ្នា ធ្វើឲ្យហានិភ័យស្ថិតក្នុងកម្រិតអប្បបរមាសម្រាប់ក្រុមអវកាសយានិករបស់ពួកយើង យានអវកាស និងបេសកកម្មរបស់ ISS ។

លោក Mike Fincke គឺជាអ្នកបើកយានអវកាសរបស់បេសកកម្ម Crew-11 និយាយដែរថា ស្ថានភាពសុខភាព បានកើតមាន ពេលដែលអវកាសយានិក ត្រៀមដើរលើទីអវកាស ជាហេតុធ្វើឲ្យមានការសម្រេចចិត្តបន្ទាន់ ក្នុងការវិលត្រឡប់មកកាន់ផែនដីវិញ ៕