ប្រធានាធិបតីរុស្ស៊ី លោក Vladimir Putin នៅថ្ងៃព្រហស្បតិ៍ (ទី២២ ខែមករា ឆ្នាំ២០២៦) បានឲ្យដឹងថា លោកនឹងពិភាក្សាអំពីការប្រើប្រាស់ទ្រព្យសម្បត្តិបង្កករបស់រុស្ស៊ី ដើម្បីគាំទ្រដល់ក្រុមប្រឹក្សាសន្តិភាពរបស់ប្រធានាធិបតីអាមេរិក លោក Donald Trump ក្នុងអំឡុងពេលមានកិច្ចប្រជុំជាមួយបេសកជនអាមេរិក នៅទីក្រុងមូស្គូ នាយប់ថ្ងៃនេះ។

លោក Putin បានធ្វើការកត់សម្គាល់បែបនេះ ក្នុងអំឡុងពេលជួបជាមួយមេដឹកនាំប៉ាឡេស្ទីន លោក Mahmoud Abbas នៅវិមានក្រឹមឡាំង មុនពេលមានកិច្ចពិភាក្សារបស់លោកជាមួយបេសកជនពិសេសអាមេរិក លោក Steve Witkoff និងកូនប្រសាររបស់លោក Trump គឺលោក Jared Kushner។

ដោយសំដៅទៅលើក្រុមប្រឹក្សាសន្តិភាពនេះ លោក Putin បាននិយាយថា៖ «យើងត្រៀមខ្លួនរួចរាល់ហើយក្នុងការផ្តល់ជំនួយចំនួន ១ពាន់លានដុល្លារដល់រចនាសម្ព័ន្ធថ្មីនេះ។ ជាដំបូង និងសំខាន់បំផុត គឺការគាំទ្រ ចំពោះប្រជាជនប៉ាឡេស្ទីន និងផ្តល់ជំនួយទាំងនេះដោយផ្ទាល់ដល់ការកសាងឡើងវិញ សម្រាប់តំបន់ហ្កាហ្សា និងដោយទូទៅ ដើម្បីដោះស្រាយបញ្ហារបស់ប៉ាឡេស្ទីន»។

លោកបានបន្ថែមថា បញ្ហាទ្រព្យសម្បត្តិរបស់រុស្ស៊ីដែលត្រូវបានបង្កក ត្រូវបានពិភាក្សារួចហើយជាមួយភាគីអាមេរិក ហើយលោកបានសង្កត់ធ្ងន់ថា វិធីសាស្រ្តរបស់រុស្ស៊ី ចំពោះបញ្ហាប៉ាឡេស្ទីន និងការដោះស្រាយ នៅតំបន់មជ្ឈិមបូព៌ា គឺ «ជាគោលការណ៍ មិនមែនជាឱកាសនិយមឡើយ»។

គួរបញ្ជាក់ថា កាលពីសប្តាហ៍មុន សេតវិមានបានប្រកាសពីការបង្កើតក្រុមប្រឹក្សាសន្តិភាព។ ប្រទេសរាប់សិបត្រូវបានអញ្ជើញឲ្យក្លាយជាសមាជិក ហើយសម្រាប់ការចំណាយចំនួន ១ពាន់លានដុល្លារ ប្រទេសទាំងនោះអាចអង្គុយនៅក្នុងក្រុមប្រឹក្សាភិបាលនេះជាអចិន្ត្រៃយ៍៕