ប្រជាពលរដ្ឋរស់នៅលើកោះ Greenland បានបង្ហាញនូវភាពធូស្រាលរបស់ពួកគេ ប៉ុន្តែនៅប្រុងប្រយ័ត្ន ក្រោយប្រធានាធិបតីសហរដ្ឋអាមេរិកលោក Donald Trump ច្រានចោលមិនប្រើកម្លាំងយោធា ក្នុងការដណ្តើមគ្រប់គ្រងកោះនៅតំបន់អាក់ទិកមួយនេះ អំឡុងសុន្ទរកថារបស់លោកនៅទីក្រុង Davos ប្រទេសស្វីស ។

លោក Isak Brandt គឺជាកាពីទែនទូកមួយរូបនិយាយថា សេចក្តីអត្ថាធិប្បាយនេះ ធ្វើឲ្យមានការធូស្រាលយ៉ាងច្រាន ក្រោយភាពភិតភ័យអស់រយៈពេលជាច្រើនខែ ប៉ុន្តែលោកបានព្រមានថា អ្នកមិនដែលស្គាល់លោក Donald Trump នោះទេ ។

ចំណែកឯអ្នកស្រី Ivi Luna Olsen គឺជាមគ្គទេសទេសចរណ៍មួយរូប និយាយដែរថា អ្នកស្រីរំភើបចិត្តណាស់ពេលឮដំណឹងបែបនេះ តែអ្នកស្រីនៅតែត្រៀមខ្លួនសម្រាប់រឿងរ៉ាវអាក្រក់បំផុត ដោយសារព្រួយបារម្ភខ្លាចថា ប្រធានាធិបតីសហរដ្ឋអាមេរិករូបនេះ នៅចង់បានកោះ Greenland ។

កាលពីថ្ងៃពុធម្សិលមិញ លោក Trump បានលុបចោលការដំឡើងពន្ធដែលលោកបានគំរាមដាក់លើប្រទេសអឺរ៉ុបចំនួន ៨ ភ្លាមៗ ដើម្បីជំរុញឲ្យមានការគ្រប់គ្រងរបស់សហរដ្ឋអាមេរិកលើកោះ Greenland ដែលជាទឹកដីពាក់កណ្តាលស្វយ័តរបស់សម្ព័ន្ធមិត្តក្នុងអង្គការណាតូ គឺប្រទេសដាណឺម៉ាក ។

វាគឺជាកែប្រែភ្លាមៗ បន្ទាប់ពីលោកទទូចថា លោកចង់កាន់កាប់កោះមួយនេះ ដែលរួមមានទាំងសិទ្ធិ កម្មសិទ្ធិ និងភាពជាម្ចាស់ ៕