ថាមពលព្រះអាទិត្យ និងថាមពលខ្យល់ បានដំណើរការល្អជាងឥន្ធនៈហ្វូស៊ីលនៅសហភាពអឺរ៉ុបជាលើកដំបូងកាលពីឆ្នាំមុន ដែលជាសញ្ញាសំគាល់ខ្ពស់ថ្មីមួយលើការផ្លាស់ប្តូររបស់អឺរ៉ុបទៅរកថាមពលបៃតង និងស្វយ័ត ។

ទីភ្នាក់ងារ Ember ដែលជាក្រុមស្រាវជ្រាវថាមពលសកលនិយាយនៅក្នុងរបាយការណ៍ “ពិនិត្យអគ្គិសនីអឺរ៉ុប” របស់ខ្លួននាថ្ងៃព្រហស្បតិ៍នេះថា ប្រភពថាមពលកកើតឡើងវិញទាំង ២នេះ បង្កើតថាមពល ៣០ភាគរយនៃអគ្គិសនីរបស់សហភាពអឺរ៉ុប(EU) ធៀបនឹង ២៩ភាគរយសម្រាប់ ធ្យូថ្ម និងឧស្ម័ន ។

លោក Beatrice Petrovich គឺជាអ្នកនិពន្ធរបាយការណ៍នេះ និយាយថា ពេលវេលាដ៏សំខាន់នេះ បញ្ជាក់ពីការផ្លាស់ប្តូរយ៉ាងឆាប់រហ័សរបស់អឺរ៉ុប ងាកចេញពីឥន្ធនៈបំភាយឧស្ម័នផ្ទះកញ្ចក់ ។

ប្រសិនបើវារីអគ្គិសនី ហើយនិងអគ្គិសនីបង្កើតឡើងពីកាកសំណល់កសិកម្ម និងអាហាររលួយ ដែលគេស្គាល់ថាជាជីវម៉ាស ត្រូវបានបន្ថែមនោះ ថាមពលកកើតឡើងវិញ នឹងរួមចំណែកទីផ្សារអគ្គិសនីកើនឡើងដល់ ៤៨ភាគរយ ។

ថាមពលនុយក្លេអ៊ែរ ដែលគ្មានការបំភាយឧស្ម័ន បង្កើតបានថាមពល EU ចំនួន ២៣ភាគរយផ្សេងទៀត ។

ពួកគេនិយាយថា ចំណុចរបត់វិជ្ជមានសម្រាប់ឲ្យអឺរ៉ុបឈានដល់ចំណុនេះ គឺដោយសារការហក់ឡើងខ្ពស់ប្រចាំឆ្នាំ ១ភាគ ៥នៃថាមពលព្រះអាទិត្យ សម្រាប់រយៈពេល ៤ឆ្នាំ ដែលមួយផ្នែកបង្កឡើងដោយសារការវាយលុករបស់រុស្ស៊ីលើប្រទេសអ៊ុយក្រែន ហើយនិងមួយផ្នែកទៀតដោយសារ ការកាត់ផ្តាច់បំពង់បង្ហូរឧស្ម័នទៅអឺរ៉ុប ។

ទីភ្នាក់ងារ Ember និយាយទៀតថា ភាគច្រើននៃការផ្លាស់ប្តូររបស់អឺរ៉ុបដែលបានកើតឡើង មិនត្រឹមតែដោយសារការវិនិយោគច្រើនលើថាមពលពន្លឺព្រះអាទិត្យក្នុងវិស័យឧស្សាហកម្មទ្រង់ទ្រាយធំ និងកសិដ្ឋានថាមពលខ្យល់ប៉ុណ្ណោះទេ ប៉ុន្តែដោយសារបន្ទះស្រូបពន្លឺព្រះអាទិត្យដាក់នៅលើដំបូលផ្ទះប្រជាពលរដ្ឋផងដែរ ៕