ក្រុមបុរាណវិទូបានរកឃើញស្នាមប្រអប់ដៃឆ្លាក់លើរូងភ្នំថ្មកំបោរលើកោះ Muna របស់ប្រទេសឥណ្ឌូនេស៊ីដែលអាចមានអាយុកាលរហូតដល់ ៦៧.៨០០ឆ្នាំ ដែលធ្វើឲ្យវាក្លាយជាគំនូរវ័យចំណាស់ជាងគេបំផុតនៅលើពិភពលោក ។

ក្រុមអ្នកវិទ្យាសាស្រ្តនិយាយថា គំនូរពណ៌ត្នោតខ្ចីដែលត្រូវបានវិភាគដោយក្រុមស្រាវជ្រាវឥណ្ឌូនេស៊ី និងអូស្រ្តាលី ត្រូវបានបង្កើតឡើងដោយការផ្លុំសារធាតុពណ៌លើប្រអប់ដៃនៅលើជញ្ជាំងថ្មក្នុងរូងភ្នំ បន្សល់ទុកនូវស្នាមរបស់វា ។

យោងតាមសេចក្តីរាយការណ៍របស់សារព័ត៌មាន Jakarta Post បានឲ្យដឹងថា បុរាណវិទូ Adhi Agus Oktaviana មកពីទីភ្នាក់ងារនវានុវត្តន៍ និងស្រាវជ្រាវជាតិឥណ្ឌូនេស៊ី បានស្វែងរកសិល្បះគំនូរប្រអប់ដៃនៅលើកោះ Muna ស្ថិតក្នុងខេត្ត Sulawesi ចាប់តាំងពីឆ្នាំ ២០១៥រហូតមក ។

លោក Adhi បានរកឃើញសិល្បះគំនូរប្រអប់ដៃនេះ ស្ថិតនៅក្រោមគំនូរថ្មីៗនៅក្នុងរូងថ្ម ដែលជាគំនូរមនុស្សជិះសេះជាមួយសត្វមាន់ ។

លោកនិយាយថា វាពិបាកបញ្ជាក់ដល់សហក្រុមអ្នកស្រាវជ្រាវរបស់លោកថា គំនូរនេះគឺជាប្រអប់ដៃតាមអ្វីដែលលោកជឿជាក់ ប៉ុន្តែចុងក្រោយលោករកឃើញចំណុចមួយដែលដូចគ្នានឹងម្រាមដៃមនុស្ស ។

លោក Maxime Aubert គឺជាអ្នកជំនាញផ្នែកវិទ្យាសាស្រ្តបុរាណវិទ្យានៅសាកលវិទ្យាល័យ Griffith ស្ថិតក្នុងប្រទេសអូស្រ្តាលីដែលជួយដឹកនាំការស្រាវជ្រាវចុះផ្សាយកាលពីថ្ងៃពុធ នៅលើកាសែត Nature និយាយថា គំនូរប្រអប់ដៃវ័យចំណាស់បំផុតដែលរៀបរាប់នៅទីនេះ គឺប្លែកខុសពីគេឯង ដោយសារវាជាស្ទីលតែមួយគត់រកឃើញនៅខេត្ត Sulawesi ។

លោកនិយាយថា ចុងម្រាមដៃត្រូវបានកែសម្រួលឡើងវិញដោយប្រុងប្រយ័ត្ន ដើម្បីឲ្យឃើញថាវាជាចង្អុលដៃ ។

សហនិពន្ធរបស់លោក Aubert គឺលោក Adam Brumm ដែលជាបុរាណវិទូនៅសាកលវិទ្យាល័យ Griffith ដែរនោះ និយាយថា វាបង្ហាញថា មនុស្សដែលគូប្រអប់ដៃអាចព្យាយាមឆ្លាក់អ្វីមួយផ្សេងទៀត ៕