លោកប្រធានាធិបតីអ៊ុយក្រែន Volodymyr Zelenskyy បាននិយាយកាលពីថ្ងៃព្រហស្បតិ៍ ២២ មករាសប្ដាហ៍នេះថា កិច្ចចរចាត្រីភាគីរវាងអ៊ុយក្រែន រុស្ស៊ី និងសហរដ្ឋអាមេរិក ត្រូវគេរំពឹងថានឹងធ្វើឡើងនៅ អេមីរ៉ាត អារ៉ាប់រួម (UAE)។  

លោក Zelenskyy បាននិយាយនៅពេលលោកថ្លែងក្នុងវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីសថា លោកគិតថាវានឹងក្លាយជាកិច្ចប្រជុំត្រីភាគីលើកដំបូងនៅ អារ៉ាប់រួម។ ជំនួបនោះនឹងបើកនៅថ្ងៃសុក្រនេះ និងថ្ងៃសៅរ៍ចុងសប្ដាហ៍នេះ។

លោក Zelenskyy បាននិយាយថា រុស្ស៊ី ត្រូវតែត្រៀមខ្លួនសម្រាប់ការសម្របសម្រួល មិនមែនត្រឹមតែអ៊ុយក្រែនទេ ដោយកត់សម្គាល់ថា ទាំងទីក្រុងគីវ និងទីក្រុងមូស្គូ ស្ថិតក្នុងស្ថានភាពលំបាកនៅចំណុចនេះនៅក្នុងសង្គ្រាមជិតបួនឆ្នាំមកនេះ។

ការអត្ថាធិប្បាយរបស់មេដឹកនាំអ៊ុយក្រែនបានកើតឡើងភ្លាមៗបន្ទាប់ពីលោកបានជួបជាមួយប្រធានាធិបតីលោក Donald Trump នៅខាងក្រៅកិច្ចប្រជុំក្នុងទីក្រុង Davos។ លោកទាំងពីរបានជួបគ្នាចុងក្រោយនៅគេហដ្ឋាន Mar-a-Lago របស់លោក Trump ក្នុងរដ្ឋ Florida កាលពីខែធ្នូ។

លោក Trump បានប្រាប់ក្រុមអ្នកសារព័ត៌មានកាលពីថ្ងៃព្រហស្បតិ៍ថា កិច្ចប្រជុំរបស់លោកជាមួយលោក Zelenskyy ល្អណាស់ ប៉ុន្តែនៅតែមានការងារច្រើនទៀតដែលត្រូវពិភាក្សា។

លោក Zelenskyy ក៏បានហៅកិច្ចប្រជុំនេះថាល្អផងដែរ ប៉ុន្តែបាននិយាយថា នេះគឺជាជំហានចុងក្រោយ ដែលជាបញ្ហាលំបាកសម្រាប់ប្រទេសអ៊ុយក្រែន។

លោកថាក្នុងអំឡុងពេលនៃការសន្ទនាណាមួយជាមួយប្រធានាធិបតីណាមួយ លោកត្រូវតែការពារផលប្រយោជន៍របស់ប្រទេសលោក។ នោះហើយជាមូលហេតុដែលការសន្ទនាគឺ ប្រហែលជាមិនសាមញ្ញទេ ប៉ុន្តែថ្ងៃនេះមានភាពវិជ្ជមានច្រើន៕