ប្រធានាធិបតីអាមេរិក លោក Donald Trump បានបញ្ជាក់ជាថ្មីម្ដងទៀតកាលពីថ្ងៃព្រហស្បតិ៍ (២២ មករា) ថា លោកនឹងទៅធ្វើទស្សនកិច្ចនៅប្រទេសចិន នៅខែមេសា ខាងមុខនេះ ហើយលោកប្រធានាធិបតីចិន Xi Jinping នឹងធ្វើដំណើរទស្សនកិច្ចទៅកាន់សហរដ្ឋអាមេរិក នៅចុងឆ្នាំ២០២៦ ដដែលនេះ។

ថ្លែងប្រាប់អ្នកយកព័ត៌មានលើយន្តហោះ Air Force One ពេលត្រឡប់ពីទីក្រុងដាវ៉ូសទៅកាន់សហរដ្ឋអាមេរិកវិញ លោក Trump បាននិយាយថា «លោកទន្ទឹងរង់ចាំជួបប្រធានាធិបតី Xi» ដោយបន្តថា «លោកតែងតែមានទំនាក់ទំនងដ៏អស្ចារ្យជាមួយប្រធានាធិបតី Xi នៃប្រទេសចិន»។ លោក Trump បាននិយាយទៀតថា ទំនាក់ទំនងរវាងប្រទេសដែលមានសេដ្ឋកិច្ចធំជាងគេទាំងពីររបស់ពិភពលោក បានក្លាយជាតានតឹង ក្នុងអំឡុងពេលជំងឺរាតត្បាតកូវីដ១៩ ប៉ុន្តែបានប្រសើរឡើងគួរឱ្យកត់សម្គាល់ ចាប់តាំងពីពេលនោះមក។

ទាក់ទងនឹងបញ្ហាពាណិជ្ជកម្មជាមួយទីក្រុងប៉េកាំង លោក Trump បានសម្ដែងក្ដីពេញចិត្តរបស់លោកថា ឥឡូវនេះ ប្រទេសចិនកំពុងទិញសណ្តែកសៀងរបស់សហរដ្ឋអាមេរិក ក្នុងបរិមាណដ៏ច្រើន ដែលជារឿងល្អខ្លាំងណាស់សម្រាប់កសិករអាមេរិក។

លោក Trump និងលោក Xi បានបើកជំនួបកំពូលដ៏សំខាន់ជាលើកដំបូងបំផុតក្នុងពេលរយៈពេល ៦ឆ្នាំ នៅថ្ងៃទី៣០ ខែតុលា ឆ្នាំមុន ក្នុងព្រឹត្តិការណ៍សេដ្ឋកិច្ច APEC នៅកូរ៉េខាងត្បូង ដោយនៅពេលនោះ មេដឹកនាំទាំងពីរបានបង្ហាញពីទំនុកចិត្តក្នុងការបង្កើត «ទំនាក់ទំនងដ៏អស្ចារ្យ» ដែលការប្ដេជ្ញាចិត្តបែបនេះ បានបង្ហាញពីទំនាក់ទំនងការទូតដ៏សំខាន់ ស្របពេលភាពតានតឹងពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង បានធូរស្រាល៕