បុគ្គលិកវិស័យសុខាភិបាលរបស់ប្រទេសវ៉េណេស៊ុយអេឡា បានចេញធ្វើបាតុកម្មឆ្លងកាត់ទីក្រុងការ៉ាកាសកាលពីថ្ងៃព្រហស្បតិ៍ ទី២២ ខែមករា ដើម្បីថ្កោលទោសការឃុំខ្លួនអតីតប្រធានាធិបតី លោក Nicolas Maduro និងទាមទារឱ្យមានការដោះលែងលោក។

លោក Nicolas Maduro Guerra សមាជិកសភា និងជាកូនប្រុសរបស់លោកMaduro បានចូលរួមក្នុងបាតុកម្មនេះ ខណៈបានធ្វើដំណើរឆ្ពោះទៅកាន់ការិយាល័យអង្គការសហប្រជាជាតិក្នុងទីក្រុងការ៉ាកាស។ លោកបាននិយាយថា បុគ្គលិកសុខាភិបាលនឹងប្រគល់លិខិតមួយច្បាប់ដែលអំពាវនាវឱ្យបញ្ចប់ទណ្ឌកម្ម និងស្នើសុំសេចក្តីថ្លែងការណ៍របស់អង្គការសហប្រជាជាតិស្តីពី «ការឈ្លានពានខាងយោធា» ប្រឆាំងប្រទេសវ៉េណេស៊ុយអេឡា។

អាជ្ញាធរប្រទេសវ៉េណេស៊ុយអេឡាបាននិយាយថា លោកMaduro ត្រូវបាន «ចាប់ពង្រត់» ក្នុងអំឡុងពេលវាយប្រហារមួយដែលបានសម្លាប់មនុស្សយ៉ាងហោចណាស់១០០នាក់ រួមទាំងបុគ្គលិកយោធាវ៉េណេស៊ុយអេឡា៤៧នាក់។ លោកMaduro ត្រូវបានចោទប្រកាន់ពីបទធ្វើជាមេគំនិតបណ្តាញជួញដូរកូកាអ៊ីន ជាមួយក្រុមជួញដូរគ្រឿងញៀនអន្តរជាតិ និងប្រឈមការចោទប្រកាន់បទព្រហ្មទណ្ឌចំនួនបួនករណី រួមទាំងភេរវកម្មគ្រឿងញៀន និងការឃុបឃិតនាំចូលកូកាអ៊ីន។

លោក Maduro បានបដិសេធជាយូរមកហើយចំពោះបទចោទប្រកាន់ទាំងនេះ ដោយនិយាយថាវាជាលេសសម្រាប់មហិច្ឆតាបរទេសលើប្រេងបម្រុងរបស់ប្រទេសវ៉េណេស៊ុយអេឡា។