រុស្ស៊ី បានបញ្ជាក់ថា ខ្លួននឹងធ្វើកិច្ចពិភាក្សាសន្តិសុខជាមួយសហរដ្ឋអាមេរិក និងអ៊ុយក្រែន នៅទីក្រុងអាប៊ូដាប៊ី នៅថ្ងៃសុក្រ (២៣ មករា) នេះ ប៉ុន្តែបានព្រមាន បន្ទាប់ពីកិច្ចប្រជុំពេលយប់ជ្រៅមួយរវាងលោកប្រធានាធិបតីរុស្ស៊ី Vladimir Putin និងបេសកជនអាមេរិក ៣រូបថា សន្តិភាពដ៏យូរអង្វែងនឹងមិនអាចទៅរួចនោះទេ លុះត្រាតែបញ្ហាទឹកដីដែលជារឿងដ៏សំខាន់ ត្រូវបានដោះស្រាយឱ្យរួចរាល់។

ជំនួយការវិមានក្រឹមឡាំង លោក Yuri Ushakov បានលើកពីការឯកភាពរបស់លោក Putin លើជំហានបន្ទាប់ ដោយប្រាប់អ្នកយកព័ត៌មានថា កិច្ចពិភាក្សាដែលបានចាប់ផ្តើមភ្លាមៗមុនម៉ោងពាក់កណ្តាលអធ្រាត្រ និងមានរយៈពេលប្រហែល ៤ម៉ោងនោះ គឺ "មានសារៈសំខាន់ណាស់ មានលក្ខណៈស្ថាបនា និងមានភាពស្មោះត្រង់"។ ទាក់ទងនឹងជំនួបនៅអាប៊ូដាប៊ី មន្រ្តីវិមានក្រឹមឡាំងរូបនេះនិយាយថា ឧត្តមនាវីឯករុស្ស៊ី Igor Kostyukov នឹងដឹកនាំក្រុមរបស់ទីក្រុងមូស្គូ ក្នុងកិច្ចពិភាក្សាសន្តិសុខត្រីភាគី ហើយប្រេសិតផ្នែកវិនិយោគ លោក Kirill Dmitriev នឹងជួបដាច់ដោយឡែកលើបញ្ហាសេដ្ឋកិច្ច ជាមួយលោក Steve Witkoff ប្រេសិតរបស់លោកប្រធានាធិបតី Donald Trump។

ប៉ុន្តែខណៈដែលគូសបញ្ជាក់ពីជំហានបន្ទាប់ លោក Ushakov មិនបានលើកឡើងពីការទម្លាយភាពជាប់គាំងដ៏សំខាន់ណាមួយនោះទេ ដោយគ្រាន់តែនិយាយថា លោក Putin បានគូសបញ្ជាក់ថា រុស្ស៊ី "ចាប់អារម្មណ៍ដោយស្មោះ" ចំពោះដំណោះស្រាយការទូត។ ទោះជាយ៉ាងនេះក្ដី មន្រ្តីរុស្ស៊ីរូបនេះបានព្រមានថា «មុនពេលរឿងនេះត្រូវបានសម្រេច រុស្ស៊ីនឹងនៅតែបន្តបន្តគោលបំណងនៃប្រតិបត្តិការយោធាពិសេសរបស់ខ្លួនយ៉ាងជាប់លាប់»។

គួរឱ្យដឹងថា កិច្ចចរចាទាំងនេះគឺជាដំណាក់កាលចុងក្រោយបំផុតនៅក្នុងការជំរុញរបស់លោក Trump ដើម្បីបញ្ចប់ជម្លោះដ៏បង្ហូរឈាមបំផុតនៅអឺរ៉ុបចាប់តាំងពីសង្គ្រាមលោកលើកទីពីរមក ដែលឥឡូវនេះ កំពុងខិតជិតដល់ចុងបញ្ចប់នៃឆ្នាំទី៤ របស់ខ្លួនហើយ៕