សេវាអាកាសធាតុជាតិអាមេរិក បាននិយាយកាលពីថ្ងៃព្រហស្បតិ៍ថា ការរំខានដល់ការធ្វើដំណើរ ការដាច់ចរន្តអគ្គិសនី និងសីតុណ្ហភាពត្រជាក់ខ្លាំង ត្រូវបានរំពឹងថា នឹងប៉ះពាល់ដល់ជនជាតិអាមេរិកចំនួន ១៥០លាននាក់ នៅថ្ងៃសុក្រ ទី២៣ ខែមករា នេះ ព្រមទាំងនៅចុងសប្តាហ៍នេះផងដែរ ខណៈព្យុះរដូវរងាដ៏ធំមួយកំពុងវាយប្រហារសហរដ្ឋអាមេរិក ជាមួយនឹងព្រិលធ្លាក់ខ្លាំង និងភ្លៀងធ្លាក់ខ្លាំង ចាប់ពីតំបន់វាលទំនាបភាគកណ្តាល រហូតដល់តំបន់ឆ្នេរភាគខាងកើត។

ក្រុមមន្រ្តីបាននិយាយថា ព្យុះនេះដែលអាចប៉ះពាល់ដល់ប្រជាជនជិតពាក់កណ្តាលនៃប្រទេស នឹងនាំមកនូវព្រិលធ្លាក់កម្រាស់រហូតដល់ ២០អ៊ីញ (ឬ ៥០,៨សង់ទីម៉ែត្រ) នៅលើតំបន់ភ្នំខ្ពស់ៗនិងនៅតំបន់ West Virginia ខណៈមនុស្សភាគច្រើនដែលរស់នៅភាគខាងកើតសហរដ្ឋអាមេរិក អាចប្រឈមនឹងផ្លូវរអិល ឬពោរពេញដោយទឹកកកដ៏គ្រោះថ្នាក់ និងការដាច់ចរន្តអគ្គិសនី ដែលអាចបណ្ដាលមកពីការបាក់រលំដើមឈើសង្កត់លើបណ្ដាញខ្សែភ្លើង។

លោក Brian Hurley អ្នកឧតុនិយមនៅមណ្ឌលព្យាករអាកាសធាតុទីក្រុង College Park រដ្ឋ Maryland បាននិយាយថា «ដោយសារអាកាសធាតុត្រជាក់ខ្លាំងពេកនៅភាគខាងជើង និងព្យុះថ្មីនេះ តួលេខពាក់កណ្តាលនៃជនជាតិអាមេរិកទាំងអស់ ស្ថិតនៅក្រោមការព្រមានមួយចំនួនផ្នែកអាកាសធាតុ »។

អ្នកឧតុនិយម បានបន្ថែមថា ទីក្រុងញូវយ៉ក បូស្តុន បាល់ទីម័រ និងវ៉ាស៊ីនតោនឌីស៊ី អាចនឹងទទួលបានព្រិលធ្លាក់ខ្លាំង និងមានសភាពសើម កម្រាស់ពី ១០ ទៅ ២៥សង់ទីម៉ែត្រ ចាប់ពីថ្ងៃសៅរ៍ស្អែកនេះតទៅ ជាមួយនឹងសីតុណ្ហភាពទាបបំផុតក្នុងរង្វង់ -៥.៥ អង្សាសេ នៅក្នុងទីក្រុងវ៉ាស៊ីនតោនឌីស៊ី ចំណែកទីក្រុងបូស្តុន មានសីតុណ្ហភាពទាបបំផុត -១៤ អង្សាសេ ហើយនៅផ្នែកផ្សេងទៀតនៃសហរដ្ឋអាមេរិក ក៏នឹងមើលឃើញអាកាសធាតុរដូវរងាដ៏កម្រោលស្រដៀងគ្នានេះផងដែរ៕