អង្គការ Save the Children បានព្រមានកាលពីថ្ងៃព្រហស្បតិ៍ថា កុមារប្រហែល ២០.000នាក់ នៅក្នុងជំរំភៀសខ្លួន និង«កន្លែងស្តារនីតិសម្បទា» នៅភាគឦសានប្រទេសស៊ីរី ប្រឈមមុខនឹងហានិភ័យកាន់តែខ្លាំងឡើង ខណៈដែលសន្តិសុខកាន់តែយ៉ាប់យ៉ឺន ចំពេលមានការប្រយុទ្ធគ្នា នៅតែបន្ត។

អង្គការនេះ បាននិយាយថា ការប៉ះទង្គិចគ្នារវាងរដ្ឋាភិបាលបណ្តោះអាសន្នស៊ីរី និងកងកម្លាំងប្រជាធិបតេយ្យស៊ីរីដែលដឹកនាំដោយជនជាតិឃើដ (SDF) បានរឹតត្បិតយ៉ាងខ្លាំងចំពោះការផ្តល់ជំនួយមនុស្សធម៌ និងបង្កើតភាពវឹកវរ នៅជុំវិញជំរំធំៗដូចជា Al-Hol និង Roj ។ ជំរំទាំងនេះ មានប្រជាជនប្រហែល   ៣០.000នាក់ ភាគច្រើនជាស្ត្រី និងកុមារ រួមទាំងជនបរទេសប្រហែល ៨.៥០០នាក់ ដែលត្រូវបានផ្លាស់ទីលំនៅ បន្ទាប់ពីការដួលរលំនៃរដ្ឋអ៊ីស្លាម នៅក្នុងទីក្រុងបាហ៊ូស( Baghouz) ក្នុងខែមីនា ឆ្នាំ ២០១៩។

អង្គការ Save the Children បានផ្អាកសេវាកម្មភាគច្រើនដែលមិនផ្តោតលើជួយសង្គ្រោះកុមារ ដោយលើកឡើងពីសមត្ថភាពមានកម្រិតក្នុងការត្រួតពិនិត្យសុវត្ថិភាព និងសុខុមាលភាពរបស់កុមារ។ លោកស្រី Rasha Muhrez នាយកប្រចាំប្រទេសស៊ីរីរបស់អង្គការនេះ បានព្រមានថា ការពន្យារពេលក្នុងការបង្កើតវិធានការការពារដែលទប់ស្កាត់ការកើនឡើងនូវហានិភ័យនៃការធ្វើឲ្យកុមាររងទុក្ខទោស កេងប្រវ័ញ្ច ឬបង្ខិតបង្ខំដោយជនប្រដាប់អាវុធ។

លោកស្រីបានសង្កត់ធ្ងន់ថា កុមារមិនគួរត្រូវបានដាក់ទណ្ឌកម្មចំពោះការយល់ឃើញថា មានទំនាក់ទំនងគ្រួសារទេ ហើយត្រូវការការការពារ និងការត្រួតពិនិត្យដោយឯករាជ្យ។

គណៈកម្មាធិការអន្តរជាតិនៃកាកបាទក្រហមកាលពីថ្ងៃពុធ ក៏បានព្រមានអំពីវិបត្តិមនុស្សធម៌កាន់តែធ្ងន់ធ្ងរឡើង ដោយកត់សម្គាល់ថា អរិភាពបានបង្ខំឲ្យគ្រួសារភៀសខ្លួនក្នុងស្ថានភាពរដូវរងាដ៏អាក្រក់ បំផ្លាញ    ហេដ្ឋារចនាសម្ព័ន្ធស៊ីវិលសំខាន់ៗ រួមទាំងស្ថានីយទឹក ទំនប់ទឹក និងបណ្តាញអគ្គិសនី ព្រមទាំងមជ្ឈមណ្ឌលឃុំឃាំង និងជំរំភៀសខ្លួន ដែលកំពុងរងការគំរាមកំហែង៕