មេបញ្ជាការយោធាជាន់ខ្ពស់អ៊ីរ៉ង់ម្នាក់កាលពីថ្ងៃព្រហស្បតិ៍ បានព្រមានសហរដ្ឋអាមេរិក និងអ៊ីស្រាអែល អំពីអ្វីដែលលោកបានពិពណ៌នាថា ជាការគណនាខុសណាមួយ ដោយនិយាយថា កងកម្លាំងអ៊ីរ៉ង់ «ត្រៀមខ្លួនរួចជាស្រេច ដើម្បីធ្វើសកម្មភាពភ្លាមៗ»។

លោក Mohammad Pakpour អគ្គមេបញ្ជាការកងឆ្មាំបដិវត្តន៍ឥស្លាមអ៊ីរ៉ង់ (IRGC) បាននិយាយថា ទីក្រុងវ៉ាស៊ីនតោន និងទីក្រុង Tel Aviv គួរតែ «ទាញយកមេរៀនពីបទពិសោធប្រវត្តិសាស្ត្រ» និង «ជៀងវាងការគណនាខុសណាមួយ» ដើម្បីគេចឲ្យផុតពី «វាសនាដ៏ឈឺចាប់ និងគួរឲ្យសោកស្តាយជាងនេះ»។

លោក Pakpour បាននិយាយថា កងកម្លាំងប្រដាប់អាវុធអ៊ីរ៉ង់ «ត្រៀមខ្លួនជាងពេលណាៗទាំងអស់» ដើម្បីអនុវត្តបទបញ្ជារបស់មេដឹកនាំកំពូល លោក Ayatollah Ali Khamenei។

លោកបានធ្វើការអត្ថាធិប្បាយនេះ នៅក្នុងសារមួយ ដើម្បីអបអរសាទរទិវាកងទ័ពជាតិអ៊ីរ៉ង់ ដែលបានចុះ ផ្សាយដោយសារព័ត៌មានផ្លូវការ Sepah News របស់ IRGC។

សហរដ្ឋអាមេរិកបានចេញការគំរាមកំហែងមិនច្បាស់លាស់អំពីការជ្រៀតជ្រែកខាងយោធាដែលអាចកើតមាន ក្នុងអំឡុងពេលតវ៉ាខែធ្នូ-មករា ខណៈដែលប្រធានាធិបតីអាមេរិកលោក ដូណាល់ ត្រាំ (Donald Trump) បានអំពាវនាវឲ្យមាន «ថ្នាក់ដឹកនាំថ្មី» នៅក្នុងប្រទេសអ៊ីរ៉ង់។

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បាននិយាយកាលពីដើមសប្តាហ៍នេះថា ការគំរាមកំហែងរបស់សហរដ្ឋអាមេរិកប្រឆាំងនឹងអ៊ីរ៉ង់ «បានផ្តល់ការលើកទឹកចិត្តដល់អ្នករៀបចំផែនការ» ដើម្បីបន្តអ្វីដែលលោកបានពិពណ៌នាថា ជាយុទ្ធសាស្ត្រនៃ «ការបង្ហូរឈាមអតិបរមា»។

លោកក៏បាននិយាយផងដែរថា ខណៈពេលដែលអ៊ីរ៉ង់ «នឹងតែងតែជ្រើសរើសសន្តិភាពជាជាងសង្គ្រាម» ប្រសិនបើប្រទេសនេះ ប្រឈមនឹងការវាយប្រហារថ្មីៗ «កងកម្លាំងប្រដាប់អាវុធដ៏មានឥទ្ធិពលរបស់យើងមិនមានការស្ទាក់ស្ទើរក្នុងការឆ្លើយតបភ្លាមៗ និងយ៉ាងម៉ឺងម៉ាត់ ជាមួយនឹងអ្វីគ្រប់យ៉ាងដែលយើងមាន» ដោយលើកឡើងពីភាពផ្ទុយគ្នានឹង«ការអត់ធ្មត់» ដែលអ៊ីរ៉ង់បានបង្ហាញ នៅក្នុងខែមិថុនា ឆ្នាំ ២០២៥៕