ប្រធានាធិបតីទួរគី លោក រ៉េសិប តាយីប អឺដូហ្កាន់ ( Recep Tayyip Erdogan) បាននិយាយកាលពីថ្ងៃព្រហស្បតិ៍ថា ប្រទេសរបស់លោក មិនពេញចិត្តនឹងការជ្រៀតជ្រែកពីខាងក្រៅ នៅអ៊ីរ៉ង់ទេ។

លោក អឺដូហ្កាន់ បានធ្វើការអត្ថាធិប្បាយនេះ ក្នុងអំឡុងពេលនៃការសន្ទនាតាមទូរស័ព្ទជាមួយសមភាគី     អ៊ីរ៉ង់របស់ខ្លួន គឺលោក Masoud Pezeshkian ដើម្បីពិភាក្សាអំពីទំនាក់ទំនងទ្វេភាគី និងបញ្ហាតំបន់។ នេះបើយោងតាមសេចក្តីថ្លែងការណ៍មួយដែលចេញដោយការិយាល័យប្រធានាធិបតីទួរគី។

ក្នុងអំឡុងពេលសន្ទនានោះ លោក អឺដូហ្កាន់ បាននិយាយថា លោកកំពុងតាមដានយ៉ាងដិតដល់នូវព្រឹត្តិការណ៍ នៅក្នុងប្រទេសអ៊ីរ៉ង់។

លោក អឺដូហ្កាន់ បានប្រាប់លោក Pezeshkian ថា៖«ទួរគីឲ្យតម្លៃដល់សន្តិភាព និងស្ថិរភាពរបស់អ៊ីរ៉ង់ ហើយទីក្រុងអង់ការ៉ា មិនដែលមើលឃើញសេណារីយោណាមួយនៃការជ្រៀតជ្រែកពីខាងក្រៅ នៅអ៊ីរ៉ង់ត្រូវបានគាំទ្រនោះទេ»។

ប្រធានាធិបតីទួរគីរូបនេះ បាននិយាយថា ការដោះស្រាយបញ្ហា និងការទប់ស្កាត់ការកើនឡើងនៃភាពតានតឹងក្នុងតំបន់ ក៏ជាវិធានការនិងគោលនយោបាយរបស់ប្រទេសទួរគីផងដែរ។

កាលពីសប្តាហ៍មុន រដ្ឋមន្ត្រីការបរទេសទួរគី លោក Hakan Fidan បាននិយាយថា ទីក្រុងអង់ការ៉ាប្រឆាំងនឹងប្រតិបត្តិការយោធាណាមួយប្រឆាំងនឹងអ៊ីរ៉ង់ និងគាំទ្រកិច្ចខិតខំប្រឹងប្រែង ដើម្បីរក្សាស្ថិរភាពក្នុង          តំបន់។ 

ការតវ៉ាបានផ្ទុះឡើងនៅទូទាំងប្រទេសអ៊ីរ៉ង់កាលពីខែមុន ជុំវិញការមិនពេញចិត្តផ្នែកសេដ្ឋកិច្ច មុនពេលឈានវិបត្តិនយោបាយ ហើយប្រែក្លាយទៅជាអំពើហិង្សា ដែលនាំឲ្យមានអ្នកស្លាប់ និងរបួស និងការខូចខាតយ៉ាងទូលំទូលាយដល់ទ្រព្យសម្បត្តិសាធារណៈ វិហារឥស្លាម អគាររដ្ឋាភិបាល និង ធនាគារ។ អាជ្ញាធរអ៊ីរ៉ង់បានបន្ទោសសហរដ្ឋអាមេរិក និងអ៊ីស្រាអែល ចំពោះការញុះញង់ឲ្យមានភាពចលាចលនេះ៕