សហរដ្ឋអាមេរិក បានបើកបង្ហាញផែនការរបស់ខ្លួនសម្រាប់ «តំបន់ហ្កាហ្សាថ្មី» ដែលនឹងមើលឃើញទឹកដីប៉ាឡេស្ទីនដ៏ខ្ទេចខ្ទាំមួយនេះ ត្រូវបានសាងសង់ឡើងវិញពីដីទទេ។ ស្លាយបទបង្ហាញ បានគូសវាសអគារខ្ពស់ៗដ៏ប្រណិតរាប់សិបខ្នង ដែលលាតសន្ធឹងតាមបណ្តោយឆ្នេរមេឌីទែរ៉ាណេ និងតំបន់លំនៅឋានក្នុង «ក្រុងរ៉ាហ្វាថ្មី» ខណៈផែនទីមួយគូសបញ្ជាក់ពីការអភិវឌ្ឍធំៗជាដំណាក់កាលនៃ «តំបន់លំនៅឋាន កសិកម្ម និងឧស្សាហកម្មថ្មី» សម្រាប់ប្រជាជន ២,១លាននាក់ របស់ហ្កាហ្សា។

សេចក្ដីលម្អិតទាំងនោះត្រូវបើកបង្ហាញក្នុងពិធីចុះហត្ថលេខាមួយនៅវេទិកាសេដ្ឋកិច្ចពិភពលោក ទីក្រុងដាវ៉ូស សម្រាប់ក្រុមប្រឹក្សាសន្តិភាពថ្មីរបស់លោកប្រធានាធិបតី Donald Trump ដែលមានភារកិច្ចបញ្ចប់សង្គ្រាម ២ឆ្នាំរវាងអ៊ីស្រាអែល និងក្រុមហាម៉ាស និងត្រួតពិនិត្យការកសាងឡើងវិញ។

ដោយលើកពីប្រវត្តិជាអ្នកជំនួញអចលនទ្រព្យដ៏ជោគជាំរបស់ខ្លួន លោក Trump ប្រកាសថា «ផែនការអាមេរិកនឹងទទួលជោគជ័យខ្លាំងនៅហ្កាហ្សា ហើយនឹងក្លាយជាទស្សនីយភាពដ៏អស្ចារ្យមួយ»។

កូនប្រសាររបស់លោក Trump គឺលោក Jared Kushner ដែលបានជួយសម្របសម្រួលបទឈប់បាញ់ក្នុងខែតុលា បាននិយាយថា គ្រាប់រំសេវចំនួន ៩ម៉ឺនតោន ត្រូវបានទម្លាក់លើហ្កាហ្សា ហើយមានកម្ទេចកម្ទី ៦០លានតោន ដែលត្រូវសម្អាតសម្រាប់ដំណើរការសាងសង់ឡើងវិញ។ លោក Kushner និយាយថា លោកជឿជាក់ថា ការសាងសង់ «ក្រុងរ៉ាហ្វាថ្មី» អាចនឹងបញ្ចប់ក្នុងពេល ២ ទៅ ៣ឆ្នាំ។

ផែនទីនៃ «ផែនការមេ» របស់អាមេរិក បានបង្ហាញឱ្យឃើញ តំបន់មួយដែលបម្រុងទុកសម្រាប់ «ទេសចរណ៍ឆ្នេរសមុទ្រ» ដែលនឹងមានអគារខ្ពស់ៗដល់ទៅ ១៨០ខ្នង ក៏ដូចជាតំបន់មួយចំនួនសម្រាប់ «តំបន់លំនៅដ្ឋាន» «តំបន់ឧស្សាហកម្ម មជ្ឈមណ្ឌលទិន្នន័យ ផលិតកម្មទំនើប» និង «ឧទ្យាន កសិកម្ម និងកន្លែងកីឡា» ជាដើម។ កំពង់ផែ និងអាកាសយានដ្ឋានថ្មី នឹងត្រូវសាងសង់នៅជិតព្រំដែនអេហ្ស៊ីប ហើយនឹងមាន «ចំណុចប្រសព្វបីផ្លូវ» ជាទីដែលព្រំដែនអេហ្ស៊ីប និងអ៊ីស្រាអែល ប្រសព្វគ្នា ក្នុងចំណោមចំណុចលម្អិតជាច្រើនទៀត៕