ប្រព័ន្ធផ្សព្វផ្សាយអ៊ីរ៉ង់ នៅថ្ងៃសុក្រ (ទី២៣ ខែមករា ឆ្នាំ២០២៦) នេះ បានដកស្រង់សម្តីរបស់ប្រធានបរមាណូរបស់ប្រទេសនេះ ដែលបាននិយាយថា អ្នកឃ្លាំមើលនុយក្លេអ៊ែររបស់អង្គការសហប្រជាជាតិ (UN) ត្រូវតែបញ្ជាក់ពីជំហររបស់ខ្លួន ជុំវិញការវាយប្រហាររបស់សហរដ្ឋអាមេរិក និងអ៊ីស្រាអែល លើទីតាំងនុយក្លេអ៊ែររបស់អ៊ីរ៉ង់ កាលពីខែមិថុនាឆ្នាំមុន មុនពេលមន្ត្រីអធិការកិច្ចត្រូវបានអនុញ្ញាតឲ្យទៅពិនិត្យទីតាំងទាំងនោះ។

លោក Mohammad Eslami បានលើកឡើងថា រហូតមកដល់ពេលនេះ ការត្រួតពិនិត្យត្រូវបានកម្រិត ចំពោះទីតាំងដែលរងខូចខាតទាំងនោះ ហើយលោកបានរិះគន់ស្ថាប័នឃ្លាំមើលនេះថា បានបណ្ដោយឲ្យសម្ពាធរបស់អ៊ីស្រាអែល និងសហរដ្ឋអាមេរិកមានឥទ្ធិពលលើវិធានការរបស់ខ្លួន។

លោក Eslami បានធ្វើអត្ថាធិប្បាយបែបនេះ ដើម្បីជាការឆ្លើយតបទៅនឹងប្រធានទីភ្នាក់ងារបរមាណូអន្តរជាតិ (IAEA) គឺលោក Rafael Grossi ដែលបាននិយាយកាលពីថ្ងៃអង្គារថា ភាពជាប់គាំង ពាក់ព័ន្ធនឹងការចូលទៅត្រួតពិនិត្យនេះ «មិនអាចបន្តជារៀងរហូតបានទេ»។

លោក Grossi មិនបានថ្កោលទោស ឬរិះគន់ការវាយប្រហារនោះទេ ហើយលោកក៏មិនបានគូសបញ្ជាក់ជាផ្លូវការ អំពីពិធីសារ សម្រាប់ត្រួតពិនិត្យទីតាំងរងការខូចខាតទាំងនោះដែរ។

ទូរទស្សន៍រដ្ឋបានដកស្រង់សម្តីលោក Eslami ដែលបានប្រាប់អ្នកសារព័ត៌មាននៅទីក្រុងតេអេរ៉ង់ កាលពីថ្ងៃព្រហស្បតិ៍ថា៖ «ទីភ្នាក់ងារនេះត្រូវតែបញ្ជាក់ពីជំហររបស់ខ្លួន ទាក់ទងនឹងការវាយប្រហារដោយយោធាលើរោងចក្រនុយក្លេអ៊ែរដែលត្រូវបានចុះបញ្ជីដោយទីភ្នាក់ងារនេះ និងស្ថិតនៅក្រោមការឃ្លាំមើលរបស់ស្ថាប័ននេះ ដើម្បីឲ្យយើងអាចដឹងថា តើពួកគេដើរតួនាទីអ្វី»៕