រដ្ឋមន្ត្រីការបរទេសបារាំង បានឲ្យដឹងថា ប្រទេសបារាំងនឹងជជែកតាមទូរសព្ទ នៅថ្ងៃសុក្រ (ទី២៣ ខែមករា ឆ្នាំ២០២៦) នេះ ជាមួយបណ្ដាប្រទេសមានឧស្សាហកម្មឈានមុខគេទាំង៧ (G7) ក៏ដូចជាបណ្ដារដ្ឋអឺរ៉ុបខាងជើង និងបាល់ទិក ដើម្បីសម្របសម្រួលការគាំទ្រ សម្រាប់បណ្តាញថាមពលរបស់អ៊ុយក្រែន បន្ទាប់ពីការទម្លាក់គ្រាប់បែករបស់រុស្ស៊ី បានធ្វើឲ្យមនុស្សរាប់សែននាក់គ្មានអគ្គិសនី និងប្រព័ន្ធកម្ដៅប្រើប្រាស់។

វិស្វករអគ្គិសនី បានធ្វើការយ៉ាងសស្រាក់សស្រាំឥតឈប់ ក្នុងស្ថានភាពគ្រោះថ្នាក់អស់រយៈពេលជាច្រើនសប្តាហ៍ បន្ទាប់ពីរុស្ស៊ីបានបង្កើនការវាយប្រហារ លើបណ្តាញអគ្គិសនីរបស់អ៊ុយក្រែន ក្នុងអំឡុងពេលមានអាកាសធាតុត្រជាក់ខ្លាំង។

ប្រធានាធិបតីអ៊ុយក្រែន លោក Volodymyr Zelenskiy បានប្រកាសអាសន្នថាមពល បន្ទាប់ពីការវាយប្រហារជាបន្តបន្ទាប់របស់រុស្ស៊ី នៅរដូវរងា បានធ្វើឲ្យកន្លែងផលិត និងចែកចាយថាមពលខូចខាត។

រដ្ឋមន្ត្រីការបរទេសបារាំង លោក Jean-Noel Barrot បានប្រាប់ទូរទស្សន៍ BFM ថា៖ «ពួកគេបន្តបាញ់ផ្លោងទៅលើទីក្រុង និងហេដ្ឋារចនាសម្ព័ន្ធថាមពលរបស់អ៊ុយក្រែន។ យើងនឹងបន្តគាំទ្រអ៊ុយក្រែន»។

លោក Barrot បានបន្តថា បារាំងនឹងផ្គត់ផ្គង់អគ្គិសនីបន្ថែមចំនួន ១៣មេហ្គាវ៉ាត់ និងម៉ាស៊ីនភ្លើងប្រហែល ១០០គ្រឿងដល់អ៊ុយក្រែន ដើម្បីជំនួសហេដ្ឋារចនាសម្ព័ន្ធដែលត្រូវបានបំផ្លាញ។ លោកបានបន្ថែមថា ប្រទេសផ្សេងទៀត ក៏នឹងសន្យាផ្តល់ជំនួយក្នុងអំឡុងពេលកិច្ចប្រជុំនៅថ្ងៃសុក្រនេះផងដែរ៕