ក្រុមអាជ្ញាធរក្នុងតំបន់និយាយកាលពីថ្ងៃព្រហស្បតិ៍ម្សិលមិញថា ការខូចខាតសេដ្ឋកិច្ចពីព្យុះស៊ីក្លូន Harry មានរហូតដល់ ១ពាន់លានអឺរ៉ូ(ស្មើនឹង ១,១ពាន់លានដុល្លារ) នៅទូទាំងតំបន់ភាគខាងត្បូងប្រទេសអ៊ីតាលី ស្របពេលខ្យល់បក់ខ្លាំង និងការកញ្ជ្រោលឡើងរបស់ព្យុះ បានវាយប្រហារតំបន់ឆ្នេរ កំពង់ផែ និងហេដ្ឋារចនាសម្ព័ន្ធ និងបង្ខំឲ្យមានប្រតិបត្តិការជួយសង្រ្គោះទ្រង់ទ្រាយធំពីឆ្មាំល្បាតឆ្នេរ ។

នៅក្នុងប្រទេសអ៊ីតាលី ព្យុះ Harry បានវាយប្រហារកោះ Sicily និងកោះ Sardinia ខ្លាំងជាងគេបំផុត ជាទីដែលក្រុមមេដឹកនាំក្នុងតំបន់ រាយការណ៍ពីការខូចខាតផ្លូវថ្នល់ កំពង់ផែ អគារតំបន់ឆ្នេរ និងសកម្មភាពផលិតកម្ម ក្នុងទំហំទឹកប្រាក់រាប់រយលានអឺរ៉ូ ។

អភិបាលកោះ Sicily បានដាក់តម្លៃខូចខាតដំបូងប្រហែល ៧៤០លានអឺរ៉ូ គឺជាតួលេខមួយត្រូវបានគេរំពឹងថា នឹងកើនឡើង នៅពេលដែលប្រាក់ចំណូលបាត់បង់ ត្រូវបានរួមបញ្ចូល ។ ក្រុមមន្រ្តីកោះ Sardinianនិយាយថា ការខាតបង់សេដ្ឋកិច្ចទាំងមូលសរុបទំនងជារាប់រយលានអឺរ៉ូ ។

ស្របពេលដែលព្យុះស៊ីក្លូន Harry បោកបក់ឆ្លងកាត់កោះ Sicily, Sardinia, Calabria និងកោះ Puglia ឆ្មាំល្បាតឆ្នេរអ៊ីតាលី បានអនុវត្តប្រព័ន្ធប្រតិបត្តិការគ្រាអាសន្ន ដាក់ពង្រាយកងទ័ពជើងទឹក កងទ័ពជើងគោក និងកងទ័ពជើងអាកាសជាង ១០០នាក់ ហើយក្រុមមន្រ្តីជាង ៤៥០នាក់ ត្រូវចុះប្រតិបត្តិការគ្រប់ពេលវេលា ។

ឆ្មាំល្បាតឆ្នេរនិយាយថា ឧទ្ធម្ភាគចក្រត្រូវបានដាក់ពង្រាយ ដើម្បីធ្វើការវាយម្លៃជាក់ស្តែងនៅតំបន់រងផលប៉ះពាល់ធ្ងន់ធ្ងរបំផុត ហើយនិងតាមដានហានិភ័យកខ្វក់បរិស្ថានដែលអាចកើតមានឡើងនៅក្នុងសមុទ្រ ។

ក្រុមអាជ្ញាធរ បានបញ្ជាផងដែរឲ្យបិទតំបន់ឆ្នេរជាច្រើនកន្លែង ដើម្បីការពារសុវត្ថិភាពសាធារណៈ ស្របពេលដែលស្ថានភាពអាកាសធាតុគ្រោះថ្នាក់ បន្តកើតមាន ៕