ទីភ្នាក់ងារកាត់បន្ថយគ្រោះមហន្តរាយឥណ្ឌូនេស៊ី បាននិយាយនៅថ្ងៃសៅរ៍ (២៤ មករា) នេះថា មនុស្សយ៉ាងតិច ៧នាក់ បានស្លាប់ និងចំនួន ៨២នាក់ ផ្សេងទៀតកំពុងបាត់ខ្លួន បន្ទាប់ពីគ្រោះបំណាក់ដីដ៏ហមន្តរាយមួយបានវាយប្រហារនៅខេត្ត ជ្វាខាងលិច ប្រទេសឥណ្ឌូនេស៊ី ស្របពេលមានរបាយការណ៍អំពីភ្លៀងធ្លាក់យ៉ាងខ្លាំងនៅក្នុងតំបន់នោះ។ មន្ត្រីមូលដ្ឋានម្នាក់បាននិយាយថា បំណាក់ដីនេះបានវាយប្រហារភូមិមួយក្នុងតំបន់ បានឌុងខាងលិច។

លោក Abdul Muhari អ្នកនាំពាក្យរបស់ទីភ្នាក់ងារនេះ បានប្រាប់សារព័ត៌មានរ៉យទ័រថា «ចំនួនមនុស្សបាត់ខ្លួនគឺខ្ពស់ខ្លាំងណាស់ ក្រុមមន្ត្រីនឹងព្យាយាមបង្កើនប្រសិទ្ធភាពនៃកិច្ចខិតខំប្រឹងប្រែងស្វែងរក និងជួយសង្គ្រោះបន្ថែមទៀត»។

ទីភ្នាក់ងារអាកាសធាតុឥណ្ឌូនេស៊ី ធ្លាប់ព្រមានរួចមកហើយអំពីអាកាសធាតុអាក្រក់ រួមទាំងភ្លៀងធ្លាក់ខ្លាំងនៅខេត្ត ជ្វាខាងលិច រយៈពេលដល់ទៅ ១សប្តាហ៍ ចាប់ពីថ្ងៃសុក្រ ទី២៣ ខែមករា តទៅ នេះបើយោងតាមការចុះផ្សាយរបស់សារព័ត៌មានក្នុងស្រុក។

ភ្លៀងធ្លាក់ខ្លាំងតាមរដូវកាល ចាប់ពីខែតុលា ដល់ខែមីនា ជារឿយៗបណ្តាលឱ្យមានទឹកជំនន់ និងបំណាក់ដីនៅឥណ្ឌូនេស៊ី ដែលជាប្រជុំកោះដល់ទៅ ១.៧០០០កោះ និងជាទីដែលមនុស្សរាប់លាននាក់រស់នៅតាមតំបន់ភ្នំ ឬនៅជិតតំបន់ទំនាបលិចទឹក ដែលមានជីជាតិ៕