ក្រុមអាជ្ញាធរឥណ្ឌូនេស៊ី កំពុងបន្តស្វែងរកមនុស្សបាត់ខ្លួនយ៉ាងហោច ៨០នាក់ ក្រោយបំណាក់ដីសម្លាប់មនុស្ស ១០នាក់ នៅខេត្តជ្វាខាងលិច ។

ទីភ្នាក់ងាររុករក និងជួយសង្រ្គោះនិយាយថា សាកសពមនុស្សត្រូវបានរកឃើញ ហើយក្រុមនគរបាលនិយាយថា ពួកគេកំពុងព្យាយាមកំណត់អត្តសញ្ញាណជនរងគ្រោះ ។ ប្រតិបត្តិការរុករក ត្រូវបានផ្អាក ដោយសារភ្លៀងធ្លាក់ខ្លាំងនៅកន្លែងកើតហេតុ ក្នុងនោះប្រតិបត្តិការនឹងត្រូវបន្តនៅថ្ងៃអាទិត្យនេះ ។

លោក Abdul Muhari អ្នកនាំពាក្យរបស់ទីភ្នាក់ងាររុករក និងជួយសង្រ្គោះបានប្រាប់ទីភ្នាក់ងារព័ត៌មានរ៉យទ័រថា ចំនួនមនុស្សបាត់ខ្លួនគឺខ្ពស់ខ្លាំងណាស់ ក្រុមមន្ត្រីនឹងព្យាយាមបង្កើនប្រសិទ្ធភាពនៃកិច្ចខិតខំប្រឹងប្រែងស្វែងរក និងជួយសង្គ្រោះបន្ថែមទៀត ។

 ទីភ្នាក់ងារឧតុនិយមឥណ្ឌូនេស៊ី ធ្លាប់ព្រមានរួចមកហើយអំពីអាកាសធាតុអាក្រក់ រួមទាំងភ្លៀងធ្លាក់ខ្លាំងនៅខេត្តជ្វាខាងលិច រយៈពេលដល់ទៅ ១សប្តាហ៍ ចាប់ពីថ្ងៃសុក្រ ទី២៣ ខែមករា តទៅ ។ នេះបើយោងតាមការចុះផ្សាយរបស់សារព័ត៌មានក្នុងស្រុក។ 

សូមបញ្ជាក់ថា ភ្លៀងធ្លាក់ខ្លាំងប្រចាំរដូវ ចាប់ពីខែតុលា ដល់ខែមីនា ជារឿយៗបណ្តាលឲ្យមានទឹកជំនន់ និងបំណាក់ដីនៅឥណ្ឌូនេស៊ី ដែលជាប្រជុំកោះដល់ទៅ ១.៧០០០កោះ និងជាទីដែលមនុស្សរាប់លាននាក់រស់នៅតាមតំបន់ភ្នំ ឬនៅជិតតំបន់ទំនាបលិចទឹក ៕