នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃអាទិត្យ (ទី២៥ ខែមករា ឆ្នាំ២០២៦) នេះ បាននិយាយថា ការលើកឡើងដោយប្រធានាធិបតីអាមេរិក លោក Donald Trump ដែលបង្ហាញនូវការមិនពេញចិត្ត ចំពោះកិច្ចប្រឹងប្រែងរបស់កងទ័ពមិនមែនរបស់សហរដ្ឋអាមេរិក នៅក្នុងប្រទេសអាហ្វហ្គានីស្ថាន គឺ «មិនអាចទទួលយកបានសោះឡើយ»។

គួរបញ្ជាក់ថា លោក Trump បាននិយាយនៅក្នុងបទសម្ភាសន៍ជាមួយប្រព័ន្ធផ្សពព្វផ្សាយ Fox News ថា អង្គាការណាតូបានបញ្ជូន «កងទ័ពមួយចំនួន» ប៉ុន្តែ «នៅឆ្ងាយពីជួរមុខ ពោលគឺនៅឆ្ងាយបន្តិចពីជួរមុខ»។ លោក Trump ហាក់ដូចជាកំពុងដកផ្នែកនៃសុន្ទរកថារបស់លោក កាលពីថ្ងៃទី២៤ ខែមករា ស្របពេលមានការខឹងសម្បាកាន់តែខ្លាំងឡើងៗ ពីសម្ព័ន្ធមិត្តអឺរ៉ុប ហើយឥឡូវនេះ ពីសម្ព័ន្ធមិត្តអូស្ត្រាលី។

អំឡុងពេលថ្លែងនៅក្នុងកម្មវិធី Insiders របស់ទូរទស្សន៍ ABC នាព្រឹកថ្ងៃទី២៥ ខែមករានេះ លោក Albanese បាននិយាយថា គ្រួសារទាហានអូស្ត្រាលីដែលបានពលីជីវិត នឹងមាន «ក្ដីឈឺចាប់» ដោយសារតែមតិយោបល់របស់លោក Trump។ លោក Albanese បាននិយាយថា «គ្រួសារអូស្ត្រាលីចំនួន ៤៧គ្រួសារ ដែលនឹងមានក្ដីឈឺចាប់ ដោយសារមតិយោបល់ទាំងនេះ ពួកគេសមនឹងទទួលបានការគោរព និងការកោតសរសើរពីពួកយើង»។

លោកបានសង្កត់ធ្ងន់ថា៖ «ភាពក្លាហានដែលត្រូវបានបង្ហាញដោយជនជាតិអូស្ត្រាលីចំនួន ៤០.០០០ នាក់ (ដែល) បានបម្រើការនៅក្នុងប្រទេសអាហ្វហ្គានីស្ថាន ពួកគេពិតជានៅជួរមុខ រួមជាមួយសម្ព័ន្ធមិត្តផ្សេងទៀតរបស់យើង ដើម្បីការពារលទ្ធិប្រជាធិបតេយ្យ និងសេរីភាព និងការពារផលប្រយោជន៍ជាតិរបស់យើង។ ពួកគេសមនឹងទទួលបានការគោរពពីពួកយើង»។

កាលពីថ្ងៃទី២៤ ខែមករា មួយថ្ងៃបន្ទាប់ពីនាយករដ្ឋមន្ត្រីអង់គ្លេស លោក Keir Starmer បានថ្កោលទោសការកត់សម្គាល់របស់លោក Trump ថា «គួរឲ្យរន្ធត់» មេដឹកនាំអាមេរិកហាក់ដូចជាបានផ្លាស់ប្តូរជំហររបស់លោក យ៉ាងហោចណាស់ ក៏ចំពោះកងទ័ពអង់គ្លេសដែរ។ លោក Trump បានលើកឡើងនៅលើវេទិកា Truth Social របស់លោកថា៖ «ទាហានដ៏អស្ចារ្យ និងក្លាហានរបស់ចក្រភពអង់គ្លេស នឹងនៅជាមួយសហរដ្ឋអាមេរិកជានិច្ច!»៕