ប្រធានាធិបតីអាមេរិក លោក Donald Trump បាននិយាយថា កងកម្លាំងយោធាអាមេរិក បានប្រើប្រាស់អាវុធមួយប្រភេទ ដែលលោកហៅថា «ឧបករណ៍ផ្ដាច់ប្រព័ន្ធ» ក្នុងអំឡុងពេលមានប្រតិបត្តិការរបស់សហរដ្ឋអាមេរិក នៅទីក្រុងការ៉ាកាស ដើម្បីទម្លាក់អតីតប្រធានាធិបតីវ៉េណេស៊ុយអេឡា លោក Nicolás Maduro ចេញពីអំណាច នៅដើមខែមករា។

នៅក្នុងបទសម្ភាសន៍ជាមួយសារព័ត៌មាន New York Post (Post) លោក Trump បានប្រាប់ថា៖ «គឺឧបករណ៍ផ្ដាច់ប្រព័ន្ធ។ ខ្ញុំមិនត្រូវបានអនុញ្ញាតឲ្យនិយាយអំពីវាទេ»។ លោកបានបញ្ជាក់ថា អាវុធនេះបានធ្វើឲ្យឧបករណ៍សត្រូវ «មិនដំណើរការ»។

បើយោងតាមសារព័ត៌មាន Post លោក Trump បានឲ្យដឹងទៀតថា៖ «ពួកគេមិនអាចបាញ់រ៉ូកែតរបស់ពួកគេបានទេ» ។ ពួកគេមានរ៉ូកែតរុស្ស៊ី និងចិន ហើយពួកគេមិនអាចបាញ់ចេញ សូម្បីមួយគ្រាប់។ យើងបានចូលទៅ ពួកគេបានចុចប៊ូតុង ហើយមិនដំណើរការ។ ពួកគេត្រៀមរួចរាល់ហើយ ដើម្បីទប់ទល់យើង»។

សេតវិមានមិនបានឆ្លើយតបភ្លាមៗនោះឡើយ ចំពោះសំណើសុំព័ត៌មានបន្ថែម អំពីអាវុធប្រភេទនេះ ដែលមេដឹកនាំអាមេរិកបានលើកឡើង។ ក្នុងរយៈពេលប៉ុន្មានម៉ោង ក្រោយការវាយឆ្មក់ឈ្មោះ Operation Absolute Resolve លោកប្រធានាធិបតីបាននិយាយសំដៅទៅលើសមត្ថភាពបច្ចេកទេស នៅក្នុងសន្និសីទសារព័ត៌មានបន្ទាប់ពីមានការវាយឆ្មក់នោះ។

លោក Trump បាននិយាយក្រោយប្រតិបត្តិការនោះថា៖ «វាមានសភាពងងឹតឈឹង ដោយភ្លើងនៅទីក្រុងការ៉ាកាសភាគច្រើនត្រូវបានបិទ ដោយសារតែជំនាញជាក់លាក់មួយដែលយើងមាន វាងងឹតឈឹង ហើយវាគឺជាប្រតិបត្តិការអាចបង្កគ្រោះថ្នាក់ដល់ជីវិត»។

គួរបញ្ជាក់ថា កងកម្លាំងអាមេរិក បានចាប់ខ្លួនលោក Maduro និងភរិយារបស់លោក គឺលោកស្រី Celia អំឡុងការវាយឆ្មក់ នៅព្រឹកព្រលឹមថ្ងៃទី៣ ខែមករា ហើយបានបញ្ជូនរូបលោកទៅសហរដ្ឋអាមេរិក ដើម្បីប្រឈមមុខនឹងការចោទប្រកាន់ព្រហ្មទណ្ឌ៕