បុគ្គល ២នាក់ដែលត្រូវបានផ្ដល់ដំណឹងអំពីបញ្ហា បាននិយាយប្រាប់សារព័ត៌មាន Reuters បាន បេសកជនអាមេរិក លោក Steve Witkoff និងលោក Jared Kushner បានទៅដល់អ៊ីស្រាអែលហើយ កាលពីថ្ងៃសៅរ៍ (ទី២៤ ខែមករា ឆ្នាំ២០២៦) ដើម្បីជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ដោយការធ្វើដំណើរទៅនេះ ភាគច្រើនគឺដើម្បីពិភាក្សាអំពីតំបន់ហ្កាហ្សា។

កាលពីថ្ងៃព្រហស្បតិ៍ សហរដ្ឋអាមេរិក បានប្រកាសពីផែនការ សម្រាប់ «តំបន់ហ្កាហ្សាថ្មី» ដែលត្រូវបានកសាងឡើងវិញពីសូន្យ ដើម្បីរួមបញ្ចូលប៉មលំនៅឋាន មជ្ឈមណ្ឌលទិន្នន័យ និងរមណីយដ្ឋានមាត់សមុទ្រ ជាផ្នែកមួយនៃការកិច្ចប្រឹងប្រែងរបស់លោកប្រធានាធិបតី Donald Trump ដើម្បីជំរុញបទឈប់បាញ់អ៊ីស្រាអែល-ហាម៉ាស ដែលត្រូវបានរង្គោះរង្គើដោយការរំលោភម្តងហើយម្តងទៀត។ ការិយាល័យនាយករដ្ឋមន្ត្រីអ៊ីស្រាអែល មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

ប្រមុខគណៈកម្មាធិការប៉ាឡេស្ទីនអន្តរកាលគាំទ្រដោយសហរដ្ឋអាមេរិក ដើម្បីគ្រប់គ្រងតំបន់ហ្កាហ្សាជាបណ្តោះអាសន្ន លោក Ali Shaath បាននិយាយកាលពីថ្ងៃព្រហស្បតិ៍ថា ច្រកព្រំដែន Rafah ដែលជាផ្លូវចេញ ឬចូលតែមួយគត់ពីតំបន់ហ្កាហ្សា សម្រាប់មនុស្សស្ទើរតែទាំងអស់ជាង ២លាននាក់ដែលរស់នៅទីនោះ នឹងបើកនៅសប្តាហ៍ក្រោយ។

ប្រភព ៣ ដែលត្រូវបានប្រាប់អំពីបញ្ហានេះ មុនមានការបើកព្រំដែនដែលត្រូវបានរំពឹងទុក បានឲ្យដឹងថា អ៊ីស្រាអែលចង់កំណត់ចំនួនប្រជាជនប៉ាឡេស្ទីនដែលចូលទៅក្នុងតំបន់ហ្កាហ្សា តាមរយៈច្រកឆ្លងកាត់ព្រំដែនជាមួយអេហ្ស៊ីប ដើម្បីធានាបានថា មានអ្នកចេញច្រើនជាងចូល។ ព្រំដែននេះត្រូវបានគេសន្មត់ថា បានបើកក្នុងអំឡុងពេលដំណាក់កាលដំបូងនៃផែនការរបស់លោក Trump ដើម្បីបញ្ចប់សង្គ្រាម ក្រោមបទឈប់បាញ់ដែលសម្រេចបានកាលខែតុលាឆ្នាំមុន រវាងអ៊ីស្រាអែល និងហាម៉ាស៕